गण्डक न्युज पोखरा, २६ मंसिर । ४० वर्ष उमेरमुनिका युवाहरुको अन्तर्राष्ट्रिय सामाजिक संगठन हो जेसिआई ईन्टरनेशनल । नेपालमा समेत निकै लामो इतिहास बोकिसकेको छ । अहिले ४४ औं राष्ट्रिय महाधिवेशनको तयारीमा छ जेसिआई नेपाल ।

सिद्धार्थनगर जेसिजको आतिथ्यतामा भैरहवामा पुस ८, ९ र १० गते गरी तीन दिनसम्म महाधिवेशन चल्नेछ । नेपाल जेसीजको इतिहासमा पोखराले चार वटा अध्यक्ष पाएको छ । हरिकृष्ण बास्तोला, विकलप्रसाद शेरचन र राजु केसीले पूर्ण कार्यकाल नेपाल जेसीज हाँके । जगत पोखरेल उमेरहद विवादमा तानिएपछि सन् २०१६ को बाँकी कार्यकालका लागि पोखराकै रविन्द्र गुरुङ अध्यक्ष चुनिए ।

पोखराबाटै अब राष्ट्रिय नेतृत्व लिने सामथ्र्य बोकेका युवा गोविन्दप्रसाद देवकोटा ४४ औं महाधिवेशनमा राष्ट्रिय उपाध्यक्षमा उम्मेदवारी दिएका छन् । पोखरा जेसीज वर्ष २०१६ का अध्यक्ष देवकोटा कम उमेरमा गौरवशाली संस्था हाँकेका युवा हुन् ।

उनी सिद्धार्थ ईन्स्योरेन्स लिमिटेडका पोखरा ब्राञ्च म्यानेजर पनि हुन् । पोखरा जेसीजको नेतृत्वपछि देवकोटाले लायन्स क्लब अफ पोखरा स्वर्णिम सिटीको अध्यक्षको जिम्मेवारी सम्हालेका छन् । विधानानुसार राष्ट्रिय उपाध्यक्ष १२ जना रहनेछन् । जसमा यस क्षेत्रबाट देवकोटा आकांक्षी हुन् । उनले जेसी मित्रहरुको सदासयताले आफू चुनिने विश्वास व्यक्त गरेका छन् । देशभर १५ सय बढी जेसिज सदस्य छन् । सन् २००९ देखि देवकोटा जेसीज अभियानमा होमिएका थिए ।

जेसिजमा अहिले सबै क्षेत्रमा स्थापित युवाहरु एकीकृत भई सामाजिक सेवामा समेत होमिरहेका छन् । तालिमको माध्यमबाट युवाको नेतृत्व तथा व्यक्तित्व विकासमा जेसिजले महत्वपूर्ण भूमिका खेलेको छ । पोखरा जेसिज सन् १९७५ देखि नै क्रियाशील संस्था हो जुन पोखराकै पुरानो सामाजिक संस्था पनि हो । पोखरा जेसिजको नेतृत्व लिएका युवाहरु अहिले विभिन्न क्षेत्रमा अग्रणी भूमिकामा छन् । पोखरा जेसिजले नै मिस पोखरा जस्तो इभेण्ट आयोजना गर्दै आएको छ ।