पोखरा, २६ मंसिर / पोखरा मुस्ताङ्ग चोकमा बिजुलीको नाङ्गो तार चुँडिने अवस्थामा पुगेको थियो । यसअघि, पोखराकै रानीपौवामा भएको दुःखद घटनाले एक जनाको ज्यान लिईसकेको थियो ।

त्यसैले सरोकारवालालाई ध्यानाकर्षणका लागि जक्सन डटकमको फेसबुक पेजबाट चुँडिन लागेको तारको तस्विर शेयर भयो । सयौंले शेयर कमेन्ट गरेर नेपाल विद्युत प्राधिकरणको ध्यानाकर्षण गराए । केहि घण्टापछि नै प्राधिकरणले सो क्षेत्रमा विद्युत अवरुद्ध गरी तारको मर्मत गरेको छ ।

गत साउन २६ गते पोखरा ११ रानीपौवामासडक माथि टांगिएको करेन्टको तार एक्कासी गुडिरहेको बाईक माथि खस्दा पोखरा लेखनाथ २० भलाम विष्णु बस्ताकोटी गम्भीर घाइते भएकोमा उपचारकै क्रममा १७ कार्तिकमा मृत्यु भयो ।

विद्युत प्राधिकरण लगायत सरोकारवाला निकायको गम्भिर लापरबाहीको शिकार उनी बने । बस्ताकोटीलाई दुई दिनपछि मणिपालमा उपचार सम्भव नहुँदा काठमाडौंको ग्राण्डी अस्पताल रिफर समेत गरियो । तर उपचारकै क्रममा साढे दुई महिनापछि उनको निधन भएको थियो । महेन्द्रपुल हुदै रानीपौवा तर्फ जाँदै गरेको ग ६ प ८१२८ नम्बरको मोटरसाइकल चालक बस्ताकोटी माथि तार खस्दा ज्यानमा करेन्ट प्रबाह भइ आगो बलेको थियो ।

घाइते बस्ताकोटी पोखरा १७ विरौटा स्थित शिशु निकेतन विद्यालयका शिक्षक थिए । पोखरा १७ बस्ने उनी राष्ट्रिय माविमा पनि आबद्ध थिए । पोखरेलीहरु यो घटनापछि सडक तथा फुटपाथमा हिँड्दा समेत नांगो तार खस्ने हो कि भनेर त्रसित हुन्छन् ।