पोखरा, पौष ११ / तनहुँ क्षेत्र नम्बर २ (ख) बाट निर्वाचित सांसद किरण गुरुङले प्रदेश ४ को मुख्यमन्त्री आफू हुने दाबी गरेका छन् ।

सोमबार पोखरामा तमु जातिको ल्होसार पर्वको अवसरमा नौ पूजा म्हृिकी कोन्मे (बांगे) आयोजित शुभकामना आदानप्रदान कार्यक्रममा बोल्दै उनले प्रदेश नम्बर ४ को मुख्यमन्त्री हुने दाबी गरेका हुन् ।

पार्टीले मूख्यमन्त्री बनाउने आश्वासन दिएपछि मात्र आफू प्रदेश सभा सदस्यमा उम्मेद्वार बनेको दिएको उनले बताए । ‘प्रदेश नम्बर ४ को पहिलो मुख्यमन्त्री मै हुँ, मलाई पार्टी नेतृत्वले मुख्य मन्त्री बनाउने भनेकैले प्रदेश सभा सदस्यको उम्मेद्वार भएको हुँ ।’, उनले भने ।

कार्यक्रममा बोल्दै सांसद गुरुङले प्रदेश नम्बर ४ लाई देशकै नमूना प्रदेश बनाउने उद्घोष गरे । उनले प्रदेश नम्बर ४ मा पर्यटन, आर्थिक र कृषिको धेरै सम्भावना भएकोले प्रदेश नम्बर ४ लाई देशकै नमूना प्रदेश बनाउन सकिने उल्लेख गरे ।

उनले भने,’देशमा लामो समयको राजनीति परिवर्तनसँगै अब आर्थिक, सामाजिक, सुशाशन र परिवर्तनको खाँचो छ, अबको ५ बर्षमा प्रदेश नम्बर ४ लाई देशकै नमुना प्रदेशको रुपमा विकास गरेर लैजाने हामीले योजना बनाएका छौं ।’

सांसद गुरुङले आफू तनहुँको कुनै प्रदेशबाट निर्वाचित भएपनि सिंगो प्र्देश नम्बर ४ को विकास र समृद्धि आफ्नो मुख्य मुद्धा हुने स्पष्ट पारे ।

प्रदेश नम्बर ४ को एमाले सचिव पृथ्वी सुब्बा गुरुङ पनि मुख्यमन्त्रीको प्रमुख दाबेदार हुन् । उनी आफू पार्टीको केन्द्रीय सचिव र किरण भन्दा वरिष्ठ भएकाले स्वतः आफू मुख्यमन्त्री बन्ने बताउँदै आएका छन् । उनी लमजुङको प्रदेश (ख) बाट नेकपा प्रदेश सभा सदस्यमा विजयी भएका हुन् । एमालेमा पृथ्वी सुब्बा ओली प्यानल हुन् भने किरण वामदेव पक्षका भनेर चिनिन्छ ।