रञ्जन अधिकारी पोखरा, १२ माघ / पोखराको सभागृहचोक स्थित एक सुनचाँदी दुकानमा शुक्रबार राति आगलागी भएको छ । ओम लक्ष्मी सुन चाँदी दुकानमा राति विद्युत सर्ट भएर आगलागी हुँदा फर्निचरमा क्षति पुगेको छ । सुनका गरगहना भित्र राखिएकाले क्षति हुन पाएन ।

सञ्चालक हर्क बहादुर सुनारका अनुसार पानी तताएपछि स्वीच अफ गर्न बिर्सदाँ राति आगलागी भएको हो । राति आठ बजेतिर सटर बाहिर धुवाँ देखिएपछि स्थानीयले सञ्चालकलाई फोन गरेर जानकारी गराएका थिए । त्यसपछि वडा प्रहरी कार्यालय, बैदामको टोली आएर सटर फोडेर आगो नियन्त्रणमा लिएको थियो । हर्कका बाबु तर्कबहादुरले पसल बन्द गर्नुअघि स्वीच अफ गर्न बिर्सेका थिए ।

‘छोरीको रिजल्ट भएकाले म छोरी लिएर घर गएकाले पसलमा थिईनँ । बुबाले चिसोमा तातो पानी तताउनुभएपछि स्वीच अफ नगरी सटर लगाउनुभएछ । पछि त्यहीँबाट आगो सल्कियो ।’ हर्कले भने– ‘ठूलो क्षति हुनबाट बच्यो । समयमै धुवाँ निस्केको थाहा पाएर फोन गरिदिनुभयो ।’

सराङकोट घर भइ पस्र्याङ बस्दै आएका सुनार परिवारले पोखरामा ४० वर्षदेखि सुनचाँदी व्यवसाय गर्दै आएका छन् । आगलागीबाट सुनचाँदी गहनामा क्षति नपुगेपनि फर्निचरका सामान, गहना राख्ने बाकसहरु नस्ट भएको छ ।