पोखरा, २२ माघ । प्रदेश नम्बर ४ को प्रदेशसभा सभामुखको निर्वाचन आगामी फागुन ३ गते हुने भएको छ ।  प्रदेशसभाको पहिलो बैठकले फागुन ३ गते दिउँसो १ बजे निर्वाचन गर्ने निर्णय गरेको हो । बैठकले अन्तरिम कार्यविधि पारित पनि गरेको छ ।

वाम गठबन्धनबीचको भागबण्डामा मुख्यमन्त्री एमाले र सभामुख माओवादी केन्द्रले पाउनेछन् । माओबादीबाट हरिबहादुर चुमानलाई सभामुख बनाउने चर्चा बढी छ । यसअघि आशा कोइरालाको नाम अगाडी आएपनि केन्द्रीय कमिटिले चुमानलाई सभामुखमा अघि सार्न लागेको बुझिएको छ ।

‘पहिले अवसर पाईसकेका नेताहरुलाई दोहोर्याउने सम्भावना छैन । नयाँ अनुहार खोज्दा हरिजी सभामुखको बलियो दावेदार हुनुहुन्छ, माओबादी श्रोतले भन्यो–अरु विकल्प निस्किन सक्छ । तर अहिलेसम्म वहाँ नै अन्तिम जस्तो हो ।’

आशा खनाल कोइराला महिला, बालबालिका तथा समाज कल्याण मन्त्रालयबाट हालै राजिनामा दिएकी हुन् । सभामुखमा माओवादीले पुरुष अगाडि सारे एमालेबाट उपसभामुखमा महिला पठाउनुपर्ने हुन्छ ।