रञ्जन अधिकारी पोखरा, २६ माघ / पोखराको सभागृह परिसरमा शुक्रबारदेखि जुत्ता चप्पल व्यापार मेला हुने भनिएको थियो । तर स्थानीय जुत्ता व्यवसायीको अवरोधका कारण रोकियो । एक महिनासम्म सञ्चालनको तयारी गरिएको मेला अब एक हप्ता मात्रका लागि शनिबारदेखि सुरु हुँदैछ । मेला आयोजक र स्थानीय व्यवसायीबीच भने कुरा मिलेको छैन । पोखरा लेखनाथ महानगरपालिका कार्यालयले आयोजकलाई एक हप्तामात्रै अनुमति दिएको हो ।

गत पुस ९ गते नै सीताराम चालिसेले माघ २५ देखि फागुन २२ गतेसम्म सभागृहमा मेला सञ्चालन गर्न महानगरमा निवेदन दिएका थिए । महानगरपालिकामा यो विभाग हेर्ने कर अधिकृत शिवहरि शर्माले माघ १८ गते सभागृहको चौर प्रयोग गर्न एक महिनाको अनुमति दिए । ठाउँ मिलेपछि मेला आयोजक नेपाली जुत्ता घर प्रालि गत वर्ष २० दिन मेला गरेझैं यसपटक पनि एक महिना गर्ने गरी पोखरा आए ।

मेला गर्ने मितिको अघिल्लो दिन पोखरा सभागृहमा जुत्ता झारेर ठाउँको तयारी गर्ने क्रममा फेरि तनाव उत्पन्न भयो । कर अधिकृत शर्माले नै माघ २६ देखि फागुन २ गतेसम्मका लागि मन्त्रः च्यान्टिङ अफ टेक्नलोजी’ कार्यक्रमका लागि अर्को समूहलाई पोखरा सभागृह प्रयोग गर्न अनुमति दिएका थिए । यसका आयोजक इनोभेटिभ घर नेपाल र युजआर्ट नेपालले स्थान नपुग्ने भन्दै आपत्ति जनायो । यद्यपी, असर नपुग्ने गरी कार्यक्रम गर्न समस्या भएन ।

उद्योगी समूहलाई आफ्नै जुत्ताको व्यवसाय गर्ने स्थानीय व्यवसायीले अवरोध गरे । खुल्ला चौरमा महिना दिनसम्म व्यापार गरेर पोखराको व्यापार चौपट पार्न आएको व्यवसायीको आरोप छ ।। गत वर्ष भारी छुट दिएको तर गुणस्तरीय सामान नरहेको भनेर आलोचित भएको बेला स्थानीय व्यवसायीलाई यही कमजोरी मसला बन्यो । आयोजक उद्योगी पक्ष सामान झारिसकेको र महानगरको अनुमति पनि लिईसकेकाले जसरी पनि गर्ने अडानमा रहे भने स्थानीय व्यवसायीले कुनै हालतमा पनि गर्न नदिने अड्डी कसेपछि विहीबार बेलुकी नै महानगरपालिकामा उनीहरु पुगे ।

छलफलकै क्रममा महानगर प्रमुख मानबहादुर जिसीले कर अधिकृत शिवहरि शर्मालाई ‘कसको अनुमतिमा एक महिनाका लागि मेला महोत्सव गर्न सभागृह दिएको ?’ भनेर हप्की दिएको प्रत्यक्षदर्शीले बताए । शर्माले त्यो क्षेत्र आफूले नै हेरिरहेको जवाफ दिएपछि जिसीले ‘सभागृहको प्रयोग कार्यक्रम, सभासमारोहका लागि हो, मेला महोत्सवका लागि एक महिनासम्म होईन । तपाईंले दिनुभएको तपाईंले नै गर्नुस्’ भनेर आक्रोश पोख्दा त्यहाँ रहेका सबै जिल्ल परे ।

ठाउँकै विषयमा एक पछि अर्को समस्या आईपरेपछि शर्मासामु प्रमुख जिसी यसरी प्रस्तुत भएका थिए । प्रमुखको ठाडो आदेशपछि कर अधिकृत शर्मा शुक्रबार तनावमा रहे । चलानी नम्बर उल्लेख, जिल्ला प्रशासन र जिल्ला प्रहरीलाई बोधार्थ बनाएर कार्यक्रम स्थगित पत्र समेत उनले तीन पटक लेख्नुपरेको थियो ।

स्थानीय व्यवसायी स्थगित गर्ने पत्र लिएर हाँस्दै निस्कन नपाउँदै महानगरपालिकामा आयोजक उद्योगी पक्ष पुग्यो । छलफलपछि एक हप्ताका लागि तत् स्थानमै कार्यक्रम गर्न स्वीकृत प्रदान ग¥यो । यस निर्णयबाट फेरि स्थानीय व्यवसायी रुष्ट बनेका छन् । शनिबार कार्यालय नखुल्ने भएकाले आइतबार पुनः महानगरलाई ध्यानाकर्षण गराउने र मेला स्थगित नभए सभागृह गेटमै तालाबन्दी गर्ने कास्की जुत्ता व्यवसायी संघका महासचिव मोहनराज पौडेलले बताए ।

यता, महानगरले एक महिनासम्म अनुमति दिएर पछि नदिने भनेपछि काठमाण्डौबाट आएका उद्योगीहरु चिन्तित थिए । महानगर प्रमुख जिसीले स्थानीय व्यवसायी र आयोजक पक्ष दुवैलाई मर्का नपर्ने गरी निर्णय भएको बताए । ‘एक त एक महिनाका लागि सभागृह एकै समूहले लगातार प्रयोग गर्ने ठाउँ नै होईन । सभागृह सभा समारोह कार्यक्रम गर्ने ठाउँ हो । शैक्षिक मेला भए त हो, व्यापार मेला महोत्सव गर्ने ठाउँ होईन । मलाई थाहा नदिई दिने काम भयो ।’ जिसीले भने– ‘तर यहाँबाट गल्ती भईसकेपछि त्यो जिम्मा महानगरले नै लिने हो, लिन्छ । खुल्ला बजारमा आफ्नो मर्यादामा रहेर सबैले व्यापार गर्न पाउँछ । त्यसैले एक हप्ताको लागि मात्र स्विकृती दियौं ।’

उनले आदर्श समाज दैनिकमा शुक्रबार प्रकाशित ‘नबिकेका जुत्ता पोखरामा ⁄’ शीर्षकको उपभोक्तामुखी समाचारमा ध्यानाकर्षण भएको जनाउँदै नबिकेका, बिग्रेका सामान लिएर ठगी गर्ने मनसायबाट आउनेहरुलाई भने महानगरले कुनै छुट नदिने बताए । उपभोक्ता मञ्च लगायत सबै सरोकारवालाको चासो यसतर्फ हुन जरुरी रहेको जिसीले बताए ।

एक हप्ताको समय पाएपछि शनिबारबाटै मेला सुरु गर्ने तयारी आयोजक पक्षले गरेको छ । नेपाली जुत्ता घर प्रालिका अध्यक्ष होमनाथ उपाध्यायले यसपटक पूराना सामान कुनै नरहेको जिकिर गरेका छन् । पहिले आलोचित बनेपनि यसपटक राम्रा सामान बेचेर सबै उपभोक्ताको चित्त बुझ्ने मौकाका रुपमा आयोजकले लिएका छन् । प्रकाशित समाचारले सुध्रने मौका दिएको र अब पोखरेलीमाझ राम्रो छाप छाडेर जाने आयोजकको मनशाय छ ।

तर, अझै पनि स्थानीय व्यवसायीले मेला सञ्चालन नै हुन नदिने अडान कसेका छन् । शनिबार पत्रकार सम्मेलन गर्ने तयारी उनीहरुको छ । कमसल सामान सस्तो मूल्यमा बेचेर प्रवद्र्धनको नाममा आफ्नै कम्पनीलाई घाटा पु¥याउने गरी व्यवसायी मारमा पार्न उद्योगी नै पोखरा आएको उनीहरुको बुझाई छ । वडा प्रहरी कार्यालय बैदामबाट प्रमुख बसन्त शर्माको नेतृत्वको टोलीले दिनभर मेला स्थलमा सुरक्षा प्रदान गरेको थियो ।