गण्डक न्युज पोखरा, २३ चैत / सेवाग्राहीसँग घुस लिएपछि जिल्ला शिक्षा कार्यालय कास्कीमा कार्यरत दुई प्राविधिक अख्तियारको फन्दामा परेका छन् । अख्तियार दुरुपयोग अनुसन्धान आयोग, पोखराले शुक्रबार दुईजना प्राविधिकलाई घुस रकम एक लाख सहित पक्राउ गरेको छ ।

कार्यालयका इन्जिनियर छविन्द्रबिक्रम खाँण र सबइन्जिनियर प्रदीपकुमार बानियाँलाई अख्तियार टोलीले पक्राउ गरेको हो । विद्यालय भवन निर्माण गर्दा गलत बिल फछर्यौट गरिदिने भन्दै उनीहरुले एक लाख रुपैयाँ घुस लिएका थिए ।

मादी गाउँपालिका–८ रबैडाँडाको नारायण आधारभूत विद्यालय र प्रभात आधारभूत विद्यालयको भवन निर्माणको सम्पन्नता पत्र दिनका लागि प्राविधिकद्वयले निर्माण समूहसँग घुस मागेको अख्तियार पोखराका प्रवक्ता रमेश ढकालले बताए ।

एक लाख दिएमात्र सम्पन्नता स्वीकृति पत्र दिने भनेपछि विद्यालय भवन निर्माण गरेको समूहले अख्तियारमा उजुरी गरेको थियो । दुई महिना अघि नै निर्माण सम्पन्न भएको विद्यालयको दुई कोठे भवन होचो भएको भन्दै सम्पन्नताको स्वीकृतिपत्र दिन प्राविधिकद्वयले मानेका थिएनन् ।

‘उजुरीको आधारमा प्राविधिकद्वयलाई घुस रकम सहित पक्राउ गरेका हौं,’ ढकालले भने, ‘उनीहरूको साथबाट एकलाख रुपैयाँ नगद फेला परेको छ ।’ पोखराको बगरमा रहेको शिक्षा कार्यालयका ती प्राविधिक घुसबापतको रकम लिन चिप्लेढुंगास्थित डेलिसियस फास्टफुड रेस्टुरेन्टमा आएका थिए । अख्तियारले उनीहरूलाई त्यही रेस्टुरेन्टबाट घुस रकमसहित पक्राउ गरेको हो ।

अन्तिम दिन भुक्तानी गर्ने क्रममा पक्राउ गरिएको हो । प्रक्राउ परेका प्राविधिकबारे थप अनुसन्धान भइरहेको अख्तियार कार्यालयले जनाएको छ ।