गण्डक न्युज पोखरा, २९ चैत / पोखरा, पृथ्वीचोक (नयाँबजार रोड) स्थित चरक मेमोरियल मेडिकेयर हस्पिटलबाटै हाम्फालेका बिरामीको मृत्यु भएको छ ।

लमजुङ क्होलासोथर २ मालिङ घर भई पोखरा ११ फुलबारी बस्ने युवराज गुरुङ हस्पिटलबाट विहीबार दिउँसो पौने ५ बजे हाम्फालेको कास्की प्रहरीले जानकारी दिएको छ । उनको उपचारका क्रममा मृत्यु भएको छ हो ।

तीन तलामाथि सिसाको झ्याल फोडेर रोडमा हाम्फाल्दा टाउको फुटेको थियो । ३० वर्षीय गुरुङलाई चरक हस्पिटलबाट मनिपाल कलेज रिफर गरिएकोमा उपचारकै क्रममा तीन घण्टापछि मृत्यु भएको कास्की प्रहरी प्रवक्ता खड्कबहादुर खत्रीले जानकारी दिए ।

यही २७ गतेबाट आईसियुमै राखेर उनको उपचार गरिँदै आएको परिवारलाई उदृत गर्दै प्रहरीले जनाएको छ । उनको मानसिक असन्तुलन देखिएको प्रारम्भिक अनुसन्धानबाट खुलेको बताईन्छ ।

तीन दिनदेखि उपचाररत उनी अर्को बेडबाट झ्यालतिरको बिरामी नाघेर सिसा फुटाई हाम्फालेका थिए । गुरुङकी श्रीमती घटनापछि बेहोस् अवस्थामा थिईन् । उनीहरुले महेन्द्रपुलमा फेन्सी स्टोर्स सञ्चालन गर्दै आएका छन् ।

तस्विरः विक्रम थापा मगरको फेसबुकबाट ।