पोखरा, १२ असार । शनिबार बिहानैदेखि सम्पर्कविहीन भएका पोखरा लेखनाथ महानगरपालिकाका बरिष्ठ अधिकृत ओमराज पौडेलको अवस्था अझै अज्ञात छ । तीनदिनदेखि बेपत्ता उनको खोजी कार्य निरन्तर गरिएपनि पत्ता लाग्न सकेको छैन ।

पछिल्लो क्रममा उनी महेन्द्रपुल चोक कटेको भिडियो सार्वजनिक भएको छ । शनिबार पूर्वान्हदेखि नै महेन्द्रपुलको मुनितिर सेती खोँचमा खोजी कार्य सुरु गरिएको थियो । त्यसपछि प्रहरीले सेती किनारमा खोजी गरिरहेको छ । शनिवार विहान ५ बजेतिर घरबाट निस्किएका उनी केहीबेरपछि महेन्द्रपुल पुगेका थिए ।

https://www.facebook.com/gandaknews/videos/848021495390104/

सेतीमा खोजी गर्ने क्रममा आईतबार सेती ड्याम समेत खोलिएको थियो । त्यसपछि पनि उनी फेला परेनन् । प्रहरीले खोजी भैरहेको जनाएको छ । उनी घरबाट निस्किने कारण पनि अनुसन्धान भैरहेको प्रहरीको भनाई छ । शनिबार विहान करिब ५ बजे तिर पत्र लेखेर घरबाट निस्किएको बताईन्छ । पत्रबारे केहि पनि खुलेको छैन ।

उनी घरबाट निस्किएपछि सेतीमा किनारमा एउटा शव फेला पारेको थियो । यद्यपी उक्त शव पुरानो र अर्कैको भएको प्रहरीले जनाएको छ । पौडेलको खोजी अहिले पनि जारी छ ।

कर्मचारी यूनियन भन्छः ‘पौडेल बेपत्ता हुनुमा महानगर दोषी’

स्थानीय तह कर्मचारी युनियनले बरिष्ठ अधिकृत पौडेल बेपत्ता हुनुमा स्वयं महानगरका प्रमुख र अन्य राजनीतिक संगठनहरु रहेको आरोप लगायो । फरक विचारका कर्मचारीलाई फसाउने, सताउने र अन्तिममा तर्साउने गरी मानसिक यातना दिईएको युनियनको आरोप छ ।

‘महानगरको प्रमुख एवं ब्यवस्थापन पक्षबाट घटुवा गर्ने, पदीय हिसावको मान मर्दन गर्ने, विना कारण अपायक सरुवा गर्ने र अतिरञ्जित लाञ्छना लगाउने गरेको कुरा जानकारीमा आएको छ, विज्ञप्तीमा उल्लेख छ – पछिल्लो समय स्थानीय तहमा जनप्रतिनिधी आएपछि फरक विचार राख्ने कर्मचारीलाई पेशागत र मानवीय संवेदनामाथी प्रहार हुन थालेको छ । यसको घोर भत्र्सना गर्दछौं ।’

महानगरकै कारण विगत ६ महिनायता पौडेललाई प्रताडित बनाईएको विज्ञप्तीमा उल्लेख छ । यस्तै कर्मचारीलाई विना भेदभाव काम गर्ने वातावरण सिर्जना गर्न पनि माग गरेको छ । पौडेलको शिघ्र खोजी गरी यस्तो अवस्था सिर्जना गर्नेमाथी खोजी गरी कारबाहीको माग गरिएको छ ।

सामाजिक सञ्जालमा चित्त दुःखाई

वेपत्ता पौडेलको विषयमा कर्मचारी यूनियनले विज्ञप्ती जारी गरेपछि राजनीति नगर्न भन्दै सामाजिक सञ्जालमा धारणाहरु सार्वजनिक भईरहेका छन् ।

पीडामा रहेका परिवारलाई झनै विक्षिप्त बनाउने गरी प्रचारबाजी नगर्न, दुःखद घटनामा राजनीति नगर्न विभिन्न क्षेत्रका व्यक्तिहरुले सचेत गराएका छन् ।