किरण श्रेष्ठ, तनहुँ । तनहुँको बन्दिपुर गाउँपालिका वडा नं १ डुम्रे बजारमा गत शुक्रबार भक्तबहादुर वि.क.को घरमा मृत अवस्थामा भेटिएका दिपक वि.क.को मृत्युको विषयलाई लिएर मंगलबार वि.क.का परिवार तथा आफन्तजनले जिल्ला प्रहरी कार्यालय तनहुँ घेराऊ गरेका छन् ।

घरधनी भक्तबहादुर वि.क.ले नै दिपकको हत्या गरेको भन्दै दिपकका परिवार र आफन्तले प्रहरी कार्यालय घेराऊ गरेका हुन् । घेराऊका क्रममा परिवारजन र आफन्तजनले दिपकको हत्यारालाई जोगाउन खोजेको भन्दै प्रहरी प्रशासन विरुद्ध नाराबाजी गरेका थिए । जिल्ला प्रहरी कार्यालय घेराऊ गर्न ठूलो संख्यामा परिवारजन र आफन्तजन उपस्थित भएका थिए ।

जिल्ला प्रहरी कार्यालय भएको घेराउलाई मध्यनजर गर्दे ठूलो संख्यामा प्रहरी परिचालन समेत गरिएको थियो । मृतक दिपककी आमा उजेली वि.क. आफ्नो छोरालाई भक्तबहादुर वि.क.ले नै हत्या गरेका बताइन् । आफ्नो छोरालाई घर समेत जान नदिएको उजेलीको भनाई रहेको छ । डोरी पनि उल्टो अवस्थामा थियो । मृतक दिपक भक्तबहादुर वि.क.कको सुनचाँदी पसलमा काम गर्ने कामदार हुन् ।

यता सो घटनाको विषयमा जिल्ला प्रहरी कार्यालय तनहुँले मंगलबार नै पत्रकार सम्मेलन गरी घटनाको विषयमा जानकारी गराएको छ । पत्रकार सम्मेलन प्रहरी प्रमुख एसपी सिद्धिविक्रम शाहले मृतक वि.क. झुण्डिएको रिपोर्ट पोष्टमार्टममा देखिएको पत्रकार सम्मेलनमा जानकारी दिए ।

प्रहरीले स्थानीय र जनप्रतिनिधिको रोहवरमा ताला काटेर भित्र गएको बताएको छ । मृतकको घाटीमा डोरिको पासो मात्रै देखिएको र शरीरको अन्य स्थानमा कुनै चोटपटक नभएको पत्रकार सम्मेलनमा जानकारी दिइएको थियो ।  घटनास्थलको प्रकृति, फोटो र भिडियोको आधारमा प्रहरी गम्भीरताका साथ अनुसन्धानमा लागेको प्रहरीले जनाएको छ ।

उक्त घटनामा ४ जना डाक्टरले पोष्टमार्टमा गरेको प्रहरी प्रमुख शाहले जानकारी दिए । मृतक दिपकको मोवाइल डाटा लिई अनुसन्धान प्रक्रिया अगाडि बढाई राखिएको समेत प्रहरी प्रमुख शाहले बताए । अनुसन्धान प्रक्रिया अघि बढिरहेको र अहिले नै यो फाइनल रिपोर्ट आइनसकेको शाहले जानकारी दिए । घटनाको जानकारी पाए लगत्तै प्रहरी घटनास्थल पुगि अनुसन्धान अगाडि बढाएको प्रहरी प्रमुख शाहले बताए । अहिलेसम्म कोहि संकास्पद व्यक्ति पक्राउ नपरेको समेत पत्रकार सम्मेलनमा जानकारी दिइएको थियो ।