पोखरा । मुलुककै ठूलो पोखरा महानगरपालिकाको चौथो नगरसभाले आठ विधेयक र एक आचारसंहिता बहुमतले पारित ग¥यो ।चौथो नगर सभामा छलफल पश्चात्त पारित भएका विधेयक राजपत्रमा प्रकाशित भएर नगरप्रमुखले प्रमाणित गरेपछि स्थानीय कानुनको रुपमा लागु हुनेछ । 

विधायन समितिका संयोजक समेत रहेका वडा १९ का अध्यक्ष शोभामोहन पौडेलले पेस गरेको विधेयकमाथि नगरसभासद्हरुबाट प्राप्त सुझाव सहित संशोधन गरिसबै विधेयक पारित भए । सभाबाट आर्थिक कार्यविधि नियमित तथा व्यवस्थित गर्ने, खेलकुद विकास, नगर प्रहरी, पर्यटन विकास, पूर्वाधार व्यवस्थापन, सुशासन, आर्थिक ऐन, सहकारी सम्बन्धमा व्यवस्था गर्न बनेको विधेयक पारित भयो भने महानगरका पदाधिकारी र कर्मचारी आचारसंहिता पारित भयो ।

सभाबाट यसअघि प्रमाणिकरण भइसकेको शिक्षा ऐनमा समेत केही संशोधन गरिएको थियो । जनप्रतिनिधि चुनिएको १९ महिनाको बीचमा पोखरा महानगरले दुई पटक बजेट अधिवेशन र दुई पटक हिउँदे नगरसभा सम्पन्न गरिसकेको छ । गत चैत २८ गते सम्पन्न दोस्रो नगर सभाले ४३ वटा विभिन्न ऐन, कार्यविधि, नियमावली, निर्देशिका निर्माण गरेको थियो।

नगरप्रमुख मानबहादुर जिसीको अध्यक्षतामा सम्पन्न नगरसभा भएको थियो ।

यसैगरी, चौथों नगरसभाले कांग्रेसबाट निर्वाचित वडा नम्बर २७ का अध्यक्ष पूर्णकुमार गुरुङको संयोजकत्वमा ५ सदस्यीय सार्वजनिक लेखा समिति गठन गरेको छ। समितिको सदस्यमा वडा ११ का अध्यक्ष मोहन बाँस्तोला, वडा २६ का अध्यक्ष नारायणप्रसाद बराल, वडा २९ का अध्यक्ष चेतबहादुर गुरुङ, वडा ६ की दलित महिला सदस्य राममाया विक छन्।