पोखरा । जेसीआई पोखराको पहिलो शुक्रवासरीय प्रवचनमाला अन्तर्गत सकारात्मक प्रभावका लागि एकता विषयमा कार्यक्रम भएको छ ।

वर्ष २०१९ को अध्यक्षीय प्रकरण सकारात्मक प्रभावका लागि एकतामा तीन जना वक्ताहरुले आफनो विचार राखेका थिए । उपाध्यक्षद्वय सन्तोष ओझा, विनोद के.सी. र निर्देशक श्रीकृष्ण सुनारले आफ्ना भनाई राखे ।

सन् १९८४ बाट पोखरा जेसीजका सदस्यहरुको बोल्ने कलाको विकासको लागि प्रवचन माला निरन्तर रुपमा आयोजना गरिदैं आएको छ । पोखरा जेसीजका सदस्यहरुले उक्त कार्यक्रमबाट परिस्कृत गर्दै नेपाल जेसीजको क्षेत्रीय र राष्ट्रिय सम्मेलनहरुमा विजेता बन्न सफल भएको अध्यक्ष सन्तोष शाहीले बताए ।

कार्यक्रमका प्रमुख अतिथि पोखरा रोयल सहकारीका सचिव तथा नेफ्स्कुन गण्डकी प्रदेशका संयोजक, पुर्व जेसीआई पोखराका सदस्य भिम गुरुङले बोल्ने कलाको विकासका लागि यो कार्यक्रम फलदायी रहेको बताए । उनले जेसीजमा प्रवेश पश्चात् निर्देशक हुँदै कार्यकारीणी उपाध्यक्ष र कानुनी सल्लाहकार सम्म भएको, सिक्ने कुरा कहिल्यै नसकिने भएकाले निरन्तर सिकाईमा लाग्नुपर्ने बताए ।

अध्यक्ष सन्तोष शाहीको अध्यक्षतामा भएको कार्यक्रममा आस्थापाठ निर्देशक सुर्य बहादुर के.सी. र स्वागत बलराम कुइंकेलले गरेका थिए ।

कार्यक्रममा जेसीआई पोखरा वर्ष २०१९ का सञ्चालक समितिका पदाधिकारीका साथै ४० जना अन्य सदस्यहरुको उपस्थिति रहेको थियो ।