तनहुँ । प्रमुख सूचना आयुक्त कृष्णहरि बाँस्कोटाले जनताप्रति उत्तरदायी भएर प्रत्येक नागरिकलाई सुचना दिनु कर्मचारीको कर्तव्य भएको बताएका छन् ।

जिल्ला प्रशासन कार्यालय तनहुँले मंगलबार दमौलीमा आयोजना गरेको ‘सूचनाको हकको संरक्षण, संवर्धन र प्रचलन एवं सुशासन प्रवर्द्धनमा राष्ट्रसेवक कर्मचारीको भूमिका बिषयक कार्यक्रममा प्रशिक्षणका क्रममा सो कुरा बताएका हुन् ।

प्रमुख सुचना आयुक्त बाँस्कोटाले राणाकाल र पञ्चायतको बेला मात्रै सूचना लुकाउने प्रचलन रहेकाले लोकतन्त्रमा सूचना लुकाउने अधिकार कसैलाई पनि नभएको बताए । सूचनाको हकलाई संविधानमा नै मौलिक हकको रुपमा भएकाले हरेक नागरिकले मागेको सूचना तत्कालै दिनुपर्नेमा जोड दिए।

सुचना लुकाउने जो कोसैलाई पनि कानूनबमोजिम कारवाही र दण्डको ब्यवस्था रहेको बास्कोटाले बताए । सुचना आयोगले कारवाही गर्दा फौजादारी कारवाही सरको हुने समेत उनले बताए ।

प्रमुख सूचना आयुक्त कृष्णहरि बाँस्कोटाले सूचनाको हक प्रभावकारी प्रयोगबाटबाट लोकतन्त्र बलियो हुने बताएका थिए ।

प्रमुख सूचना आयुक्त बाँस्कोटाले हरेक सरकारी कार्यालयले तीन/तीन महीनाभित्र आफूले गरेको काम सार्वजनिक गर्नुपर्ने र त्यसका लागि आमसञ्चार माध्यमको सहयोग लिन सकिने उल्लेख गर्दै प्रयोजन खुलाएर लिखित सूचना माग गरेको खण्डमा तत्काल दिनुपर्ने बताए ।

मागेको सूचना नदिएको खण्डमा २५ हजारसम्म जरिवाना, दैनिक २०० जरिवाना, विभागीय कारवाही र अटेरीबापत रु १० हजार थप जरिवाना गर्न सकिने कानूनी प्रावधान रहेको पनि उनले जानकारी दिए ।

अन्तर्राष्ट्रिय सम्बन्ध खलल पर्ने,सुरक्षामा असर पर्ने, अपराधको अनुसन्धानमा असर पर्ने, आर्थिक हितमा असर पर्ने, बौद्धिक हितमा असर पर्ने, बैंकिङ गोपनीयतामा असर पर्ने, जातीय सद्भाव भड्किने र विषय र व्यक्तिगत गोपनीयताको विषयमा भने सूचना दिन बाध्य नहुने व्यवस्था रहेको पनि प्रमुख सूचना आयुक्त बाँस्कोटाले जानकारी दिए ।

सो अवसरमा प्रमुख जिल्ला अधिकारी भरतकुमार शर्माले सूचनाको हक कार्यान्वयनका लागि प्रतिवद्वता ब्यक्त गरेका थिए । कार्यक्रममा जिल्ला समन्वय समिति तनहुँकी उपप्रमुख पवित्रा पौडेल जिल्लाका सरकारी कार्यालयका प्रमुख तथा सुचना अधिकारीको सहभागिता रहेको थियो ।

यसैगरी मंगलबार पत्रकारहरु सँग कुरा गर्दै प्रमुख आयुक्त बाँस्कोटाले संचारकर्मीले सुचनाको हकको प्रयोग गर्न आग्रह गरेका थिए ।