काठमाडौं । शुक्रबार नेपाल सरकारले डा. सिके राउतसँग गरेको ११ बुँदे सहमतिप्रति सत्तारुढ नेकपाभित्र तीव्र असन्तुष्टि देखिएको
छ । सरकारले स्वतन्त्र मधेस गठबन्धनसँग गरेको ११ बुँदे सहमतिको बिषयमा नेकपाभित्र असन्तुष्टि बढेको हो । सहमतिको औपचारिक घोषणा गर्नुअघि नेकपा सचिवालय बैठकमा यसबारे जानकारी दिइएको थियो ।

सरकार र सिके राउत बिच भएको सहमतिमा नेकपा भित्रकै नेताहरुले प्रश्न उठाएका हुन् । सहमति गर्नुपूर्व पार्टीमा छलफल नभएको र जेलबाट छुटेलगत्तै सहमति गरेर अदालतलाई प्रभावमा पारेर निर्णय गराएको सन्देश जनतासामु गएको भन्दै केही नेताहरुले असन्तुष्टि जनाएका हुन् ।

नेकपाका एक नेताका अनुसार हिजोमात्रै जेलबाट छुटेको मान्छेसँग रातारात सहमति सम्भव नभएपनि अदालतलाई प्रभावमा पारेर निर्णय गरिएको सन्देश गएको छ ।

सिके राउतसँग वार्ता गर्न प्रधानमन्त्री केपी शर्मा ओलीले महासचिव विष्णु पौडेलसहितका केही नेतालाई खटाएका थिए । तर, यो वार्ताबारे अर्का अध्यक्ष पुष्पकमल दाहाल प्रचण्डसमेत बेखबर थिए ।

प्रचण्डले शुक्रबारको सचिवालय बैठकमै राउतसँग भएको सहमतिबारे आफूलाई पूर्वजानकारी नभएको बताएका छन् ।

११ बुँदे सहमतिमा कहीँ पनि राउतले आफूले हिजो गरेको विखण्डनकारी गतिविधि त्यागेको प्रतिवद्धता नजनाएको नेताहरुले बताएका छन् ।