तनहुँ । तनहुँको भानु १३ को मिर्लुङ्गमा मृत अवस्थामा एउटा भालु फेला परेको छ । घरघरमा गई मानिसलाई नै आक्रमण गरी आतंक मच्चाउने भालु मृत अवस्थामा भेटिएको हो ।

भालुले मिर्लुङ्गको चनौटे, तीनघर, बिसाउन, खड्कागाउँ, असिमुरे, सिस्ने, बाँकेपसल, मियाँगाउँ लगायतका गाउँका घरघरमा गई गाईभैसीको कुँडो, कुखुरा, फर्सी, कोदो लगायतका अन्नवाली खाने तथा मानिसलाई समेत आक्रमण गरी आतंक मच्याएको थियो ।

उक्त गाउँगाउँमा डुलेर आतंकित बनाउने ३ वटा भालु मध्य एउटा भालु गत शनिबार मृत अवस्थामा भेटिएको हो । भालुको आक्रमणबाट स्थानीय २ जना घाइते समेत भएका थिए । घाइते मध्ये एक जना उपचार पछि ठिक भएर घर फर्किका छन् भने एक जनाको पोखरामा उपचार भइरहेको छ ।

भालुकै कारण गाउँका मानिसहरु त्रसित अवस्थामा छन् । मृत अवस्थामा भेटीएको भालु बुढो भएकाले रुखबाट खसेर मरेको हुनसक्ने स्थानीयको अनुमान छ । मरेको भालुलाई डिभजिन वन कार्यालय तनहुँले आवश्यक प्रक्रिया पुरा गरी गाडेको छ ।