पोखरा । पोखरा महानगरपालिका र भूमि व्यवस्था, कृषि तथा सहकारी मन्त्रालय, गण्डकी प्रदेशको सहमतिमा पोखरा महानगरपालिका वडा नम्बर २१, दोविल्लामा बनाउन लागिएको आधुनिक बधशाला निर्माणमा स्थानीयले अस्वीकार गरेका छन् । महानगरपालिका र प्रदेश सरकारले बधशाला निर्माणको लागि छनौट गरेको ठाउँ दाहसंस्कारस्थल (घाट) भएको भन्दै स्थानीयहरुले अस्वीकार गरेका हुन् ।

दोविल्लामा आधुनिक बधशाला बनाउनका लागि प्रदेश मन्त्रालयका सचिव दुर्गाप्रसाद दवाडी र महानगरका प्रमुख प्रशासकीय अधिकृत शेषनारायण पौडेलले समझदारीपत्रमा हस्ताक्षर गरिसकेका छन् ।  बधशाला बनाउनका लागि करिब १० करोड लागत अनुमान गरिएको मध्य हाल प्रदेश सरकारबाट ३ करोड रुपैँया र महानगरपालिकाबाट २ करोड गरी कुल ५ करोड बजेट बिनियोजन भईसकेको छ ।

महानगर र प्रदेश सरकारले बधशाला निर्माण गर्ने भनेको उक्त ठाउँमा पोखराको निर्मलपोखरी, बिरौटा, रातोपैह्रा, कृष्ती, स्याङ्जाको टक्सार, चिलाउनेखर्क, हलेदे लगायतका बिभिन्न ठाउँका मानिसहरुको दाहसंस्कार गर्ने गरिएको स्थानीयहरु बताउँछन् ।

सदिँयौदेखि दाहसंस्कार गर्दै आएको ठाउँमा बधशाला बनाउन खोज्नु धर्म-संस्कार मास्न खोजेजस्तै भएको स्थानीयको भनाई छ ।
‘जग्गा नापजाँच गर्न गएका इञ्जिनियरलाई स्थानीयले फर्काईदिए’

महानगरपालिका र प्रदेश सरकारको सहमति अनुसार दोविल्ला घाटमा बधशाला निर्माणका लागि आबश्यक जग्गा नापजाँच गर्न शुक्रबार गएका इञ्जिनियरको टोलीलाई काम गर्न नदिई फर्काइदिएको स्थानीय बताउँछन् । शुक्रबार एञ्जिनियरको टोलीलाई फिर्ता पठाएका स्थानीयले उक्त ठाउँमा बधशाला निर्माण गर्न नदिने उदेश्यले तीन सय विरुवा बृक्षरोपण गरेका छन् ।