राजविराज । प्रचण्ड गर्मीले हैरान राजविराज नगरबासी वर्षा सुरु हने बितिकै फेरी अर्को समस्यामा परेका छन् । सोमबार बिहान दुई घण्टा भएको वर्षाले मात्र राजविराजनगरको अधिकांश भाग जलमग्न बनेपछि गर्मीले राहत महशुस नगर्दै अर्को समस्याले नगरबासी पिरोलिएका हुन् ।

वर्षाका पानीले नगरका गजेन्द्र चौक, नेताचौक, सिरहा रोड, अदालत रोड, धर्मसाला रोडलगायतका क्षेत्र जलमग्न भएका हुन् । नगरको मुख्य बजार क्षेत्रमा समेत वर्षाको पानीले निकास नपाउँदा सर्बसाधारण समस्यामा परेको स्थानियको भनाइ छ ।

पानी निकासको स्थायी समाधान नखोज्दा प्रत्येक वर्ष वर्षायाममा सडकमै भेल हुने र आवागमनमा समस्याका साथै ठाउँ ठाउँमा फोहरको डगुंर र सडकको कालोपत्रे उप्केर खाल्डो खुल्डी हुने गरेको नगरबासीको भनाइ छ ।

यस्तै जथाभावी फालिएको फोहर सडकमा जमेका पानीमा मिसिएर दुर्गन्ध फैलिँदै जाने र विभिन्न रोगको संक्रमण फैलाउने सम्भावना समेत रहेको नागरिक सञ्जालका सप्तरीका अध्यक्ष सुखराम यादवको भनाइ छ ।

सडकमै पानी जमेका कारण स्कुल जाने बालबालिकाहरु समेत समस्यामा पर्ने गरेको अभिभावक रामनारायण मेहताले सुनाए । ‘दुई घण्टाको वर्षाले यस्तो समस्या छ भने निरन्तरको वर्षाले के हाल होला ?’ प्रशनगर्दै उनले भने, ‘यसतर्फ बेलैमा सम्बन्धीत निकायको ध्यान जानु जरुरी छ ।

यस्तै केही दिनयता चर्को घाम र तातो हावाले कष्टकर बन्दै गएको जनजीबन सोमबारको दुईघण्टे वर्षाले केहिबेर राहत महशुस गराउन नपाउँदै पुनः सुरु भएको चर्को घाम र गर्मीले जनजीवन थप कष्टकर बनाएको छ ।rajdhanidaily