दमौली । सत्तारुढ नेपाल कम्युनिस्ट पार्टी (नेकपा)ले जिल्ला इन्चार्ज र सह-इन्चार्ज टुंगो लगाएको छ । बालुवाटारमा आइतबार बसेको पार्टीको सचिवालय बैठकले ७७ जिल्ला र ६ महानगर कमिटीका इन्चार्ज र सहइन्चार्जहरुको टुंगो लगाएको हो ।

नेकपा तनहुँको इन्चार्जमा हरिबहादुर चुमान चयन भएका छन् । चुमान गण्डकी प्रदेश प्रदेशका आन्तरिक मामिला तथा कानुन मन्त्री समेत हुन् । त्यसैगरि तनहुँ जिल्लाको सह-इन्चार्जमा आशा कोइराला, एकबहादुर राना र प्रतापलाल श्रेष्ठ(पिएल) चयन भएका छन ।

४५ इन्चार्ज पूर्वएमाले र ३८ जना पूर्वमाओवादीको भागमा परेको छ । काठमाडौंको इन्चार्ज तत्कालीन एमालेको भागमा परेको छ भने भक्तपुर र ललितपुरमा पूर्वमाओवादीको भागमा परेको छ । प्रधानमन्त्री निवास बालुवाटार आइतवार अपरान्ह बसेको सचिवालय बैठकले केन्द्रीय कमिटी सदस्यहरुको कार्यविभाजन गर्ने सन्दर्भमा इन्चार्ज र सहइन्चार्जको टुंगो लगाएको बैठकपछि नेकपा नेता बामदेव गौतमले बताए ।

साबिक एमाले र माओवादीका जिल्ला इन्चार्जहरुलाईनै इन्चार्ज र सहइन्चार्जको भूमिका दिइएको र कतिपय जिल्लामा नयाँले जिम्मेवारी पाएको बताइएको छ । पार्टीका ३२ वटा विभागका प्रमुख र उपप्रमुख भने मंगलवारको बैठकबाट टुंगो लगाउने नेकपाको तयारी छ । विभागहरुको सन्दर्भमा भने छलफल अझै आवश्यक परेको नेताहरुले बताएका छन् ।