तनहुँ । पहिचान नखुलेको सवारीसाधनले ठक्कर दिँदा एकजना वृद्धको मृत्यु भएको छ । तनहुँको आबुखैरेनी गाउँपालिका वडा-३ पानीघट्ट बस्ने वर्ष ७९ का खड्कबहादुर दर्लामीको दुर्घटनामा परि मृत्यु भएको हो ।

दुर्घटनामा परि घाइते भएका दर्लामीलाई अस्पताल लैजाने क्रममा मृत्यु भएको जिल्ला प्रहरी कार्यालय तनहुँले जनाएको छ ।

आबुखैरेनी-३ बगुवामा उक्त दुर्घटना भएको प्रहरीले जनाएको छ । दुर्घटना बिहानै भएको हो । डुम्रेबाट आबुखैरेनी तर्फ जादै गरेको सवारीले दर्लामीलाई ठक्कर दिएको हुनसक्ने प्रहरीको अनुमान रहेको छ ।

ठक्कर दिने सवारी अहिले फरार रहेको छ । उक्त सवारीको खोजी कार्य तिव्र रुपमा भईरहेको जिल्ला प्रहरी कार्यालय तनहुँले जनाएको छ ।

बिहान १० बजे देखी करिब ११ बजे सम्म पृथ्वी राजमार्ग स्थानीयले अवरुद्ध समेत गरेका थिए । अहिले भने अवरुद्ध सडक संचालनमा आइसकेको र कुनै अवरोध नरहेको जिल्ला प्रहरी कार्यालय तनहुँका डिएसपी लिलाराज लामिछानेले बताए । छिटै उक्त फरार सवारी पक्राउ गर्ने समेत उनले बताए ।