तनहुँ । अज्ञात समूहले तनहुँको घिरिङ गाउँपालिका–२ घोर्लीछापमा रहेको एनसेलको टावरमा आगजनी गरेको जिल्ला प्रहरी कार्यालय तनहुँले जनाएको छ ।

अज्ञात समूहले बुधबार राती करिव ११ बजे घोर्लीछापको टावरमा आगजनी गरी क्षति पु¥याएको जिल्ला प्रहरी कार्यालय तनहुँका प्रहरी नायव उपरीक्षक लिलाराज लामिछानेले जानकारी दिए । उनका अनुसार एनसेलका टेक्निसियनले आगलागीका बारेमा जानकारी दिएको हो ।

अन्य जिल्लामा जस्तै तनहुँ प्रहरीले पनि विप्लव नेतृत्वकै माओवादीले आगोलागीको घटना घटाएको अनुमान लगाएको छ । आगजनी गर्ने समूहको खोज तथा अनुसन्धान भइरहेको जिल्ला प्रहरी कार्यालय तनहुँले जनाएको छ ।

गण्डकी प्रदेशका सातवटा जिल्लाका विभिन्न स्थानमा रहेको एनसेलका टावरमा अज्ञात समूहले आगजनी गरेको छ । तनहुँसंगै अज्ञात समुहले गोरखा, कास्की, पर्वत, म्याग्दी, नवलपुर र बाग्लुङ्गका विभिन्न स्थानमा रहेको एनसेलका टावरमा आगजनी गरेका छन ।

तर, हालसम्म टावरमा आक्रमण गर्ने को ? भन्ने बारे प्रहरीले केही बताएको छैन । यसअघि नेपाल बन्दको समयमा नेकपा विप्लव समूहले यस्तो गतिविधि गर्दै आएको थियो । विप्लव समूहले पनि अहिले घटनाको जिम्मेवारी लिएको छैन ।

तर, प्रहरी स्रोतले भने नेपालमा अहिले विप्लव समूहले मात्र यस्तो काम गर्दै आएको दाबी गर्दछ । देशभरका विभिन्न जिल्लाका दुर संचार प्रदायक संस्थाको टावरमा आक्रमण भएको छ । क्षति पु¥याएको मध्ये अधिकांश स्थानका एनसेल टावरमा आक्रमण भएको हो भने अर्घाखाँचीमा नेपाल टेलिकमको टावरमा आगजनी गरेको छ ।