तनहुँ । गण्डकी प्रदेश सरकार अन्तर्गतका मुख्यमन्त्री वातावरणमैत्री कृषि गाउँका कर्मचारीले मुख्यमन्त्री पृथ्वीसुब्बा गुरुङलाई ज्ञापनपत्र बुझाएका छन् । अघिल्लो आर्थिक वर्षमा नियुक्त गरिएका ३८ प्राविधिकहरुले जानकारी बिना जागिर खोसिएको भन्दै मुख्यमन्त्री गुरुङलाई उनीहरुले ज्ञापनपत्र बुझाएका हुन् ।

प्रदेशको भूमि व्यवस्था, कृषि तथा सहकारी मन्त्रालयले मन्त्री परिषदबाट मुख्यमन्त्री नमूना कृषि गाउँ कार्यक्रम सञ्चालनको लागि आर्थिक वर्ष २०७५/७६का लागि करारमा भर्ना लिइएका कर्मचारीले बिना पेश्की करिब २५ लाख रुपैयाँ बराबरको काम सकाइसकेको अवस्थामा बिना जानकारी हटाइको प्रति ध्यानाकर्षण भएको ज्ञापनपत्रमा जनाइएको छ ।

करारमा काम गरिरहेका कर्मचारीलाई बिना जानकारी हटाएर नयाँ विज्ञापन खुलाइएकोप्रति आपत्ति जनाएका
कृषि गाउँ कार्यक्रममा काम गरिरहेका कर्मचारीलाई नै बिना कुनै परीक्षा र अन्तवार्ता बिना राखिनुपर्र्नेे तथा हटाउनुको कारण सहित जानकारी गराउन माग गर्दै उनीहरुले मुख्यमन्त्री गुरुङ ज्ञापनपत्र बुझाएका हुन् ।

प्रदेशका ३६ निर्वाचन क्षेत्रमा भइरहेको मुख्मन्त्री वातावरणमैत्री नमूना गाउँ कार्यक्रम अपुरो र विचल्लित भएको समेत उनीहरुले मुख्यमन्त्री, मुख्य सचिव, प्रदेश भूमि व्यवस्था तथा सहकारी मन्त्रालय एवं सरोकारवालाहरुलाई मुख्यमन्त्री वातावरणमैत्री नमूना गाउँ कार्यक्रमका संयोजक विकास कुमार श्रेष्ठद्वारा हस्ताक्षरित ज्ञापनपत्रमा जानकारी गराइएको छ ।

ज्ञापनपत्र बुझ्दै मुख्यमन्त्री पृथ्वी सुब्बा गुरुङले कृषि मन्त्रालयबाट योग्य कर्मचारीलाई राखी अयोग्य कर्मचारीलाई हटाउने उद्देश्यले विज्ञापन गराइएको जानकारी दिए ।

मुख्यमन्त्री गुरुङका अनुसार योग्य कर्मचारीलाई प्राथमिकता दिइने र अयोग्य कर्मचारीलाई हटाइनेछ ।