पोखरा । पोखरा महानगरपालिका-२२ पुम्दी-भुम्दीका स्थानीय युवाहरुले निषेधित क्षेत्रमा फोहोर फाल्ने दुई जनालाई रंगेहात पक्राउ गरेका छन् । पोखरा-१७ बिरौटाबाट बोलेरो गाडीमा घर बनाइ सकेपछि प्रयोगमा नआएका सामाग्री लिएर उनीहरु दुवै जना आइतबार साँझ भ्यूपोइन्ट पुगेका थिए ।

स्थानीय सुवास सुवेदीले देखेपछि भ्यूपोइन्ट युवा क्लबको सक्रियतामा उनीहरुलाई पक्राउ गरिएको हो । ग २ च ८१४५ नम्बरको बोलेरोमा गएका उनीहरुलाई पक्राउ गरिएको क्लबका अध्यक्ष सुन्दर बराल ‘धड्कन’ ले जानकारी दिए ।

पक्राउ परेकाको आग्रह अनुसार नाम खुलाइएको छैन् । पक्राउ परेकालाई पाँच हजार जरिवानासहित आगामी दिनमा फेरि सोही क्रियाकलाप दोहोरिए कडा कार्बाही गर्ने चेतावनी दिएर छाडिएको क्लबका सचिब कुशल बरालले बताए । यसअघि पनि क्लबले ५ पटकसम्म जथाभावी फोहोर फाल्नेलाई पक्राउ गरेको थियो । क्लबका अध्यक्ष बरालले बाहिरबाट फोहोर फाल्न आउने गरेको थाहा पाएपछि आफूहरुले निरन्तर निगरानी राखिरहेको बताए ।

उनका अनुसार बाहिरबाट फोहोर फाल्न पोखराको महेन्द्रपुलदेखि व्यवसायी पुग्ने गरेका छन् । ‘फोहोर फाल्न बाहिरबाट आउने गरेको थाहा पाएपछि हामीले निरन्तर निगरानी गरिरहेका छौं,’ उनले भने, ‘विभिन्न व्यवसायीहरुले गाडीभरी फोहोर फाल्न पठाउने गरेको पाइन्छ ।’

क्लबको सक्रियतामा पुम्दी-भुम्दीअन्तर्गत खाडेखोला, तिलार, ठुलिबिडि, भ्यूपोइन्ट, अर्चलबोट, कालीमाटीबाट जथाभावी छोडिएका छाडा चौपायालाई महनगरसँग सहकार्य गरेर महानगरको पशुघरमा छाडिएको थियो ।

यस्तै क्लबले राजमार्ग छेउछाउमा अवैधानिक ढङ्गले राखिएका होडिङ बोर्डहरु हटाउनुका साथै राजमार्ग आसपासमा पटकपटक सरसफाइ कार्यक्रम पनि गरिसकेको सचिब बरालले जानकारी दिए ।

BY ANUP POUDEL/www.bigkhabar.com

http://gandaknews.com/view-point-club/