किरण श्रेष्ठ, तनहुँ । तनहुँको व्यास नगरपालिका वडा नम्बर १ मुसेखोलामा चितुवा मृत अवस्थामा फेला परेको छ ।

पृथ्वी राजमार्ग अन्तर्गत दमौली-डुम्रे सडकखण्डमा पर्ने मुसेखोला राजमार्गबाट नजिकै रहेको छ ।

उक्त मृत अवस्था फेला परेको भाले चितुवाको ढाड भाचिएको डिभिजन बन कार्यालय तनहुँका प्रमुख केदार बरालले बताए । ‘गाडीले हानेको जस्तो देखिन्छ’ प्रमुख बरालले भने ‘चोट लागेपछि खोला तिर गएको र खोला नजिक बान्ता गरेको देखिन्छ ।’

उक्त भाले चितुवा करिब ८ वर्ष जतिको उमेर र ४० किलो जति तौल रहेको प्रमुख बरालले बताए । आज बुधबार राती करिब २-३ बजेको समयमा उक्त घटना भएको अनुमान प्रमुख बरालको रहेको छ ।

सो चितुवाको छाला काडेर चितवन राष्ट्रिय निकुञ्ज पठाइने र चितुवालाई डिभिजन बन कार्यालयको पछाडी खाल्डा खनेर पुरिने बरालले जानकारी दिए ।

सोमबार मात्रै पेट फुटेको अवस्थामा व्यास-७ साखुलीमा चितुवाको डमरू मृत फेला परेको थियो ।

तनहुँ कै भानु नगरपालिकाको वडा नम्बर १,२,३ र ४ मा करिब २० महिनाको अवधिमा चितुवाको आक्रमणमा परी ६ जना बालबालिकाको ज्यान गैसकेको छ भने ४ जना घाइते भएका छन् ।

भानुबासी लाई सतर्क रहन पनि डिभिजन बन कार्यालयले अनुरोध गरेको छ ।