राजकिरण छत्कुली, पोखरा । नेपाल राष्ट्रिय कर्मचारी संगठन (निजामति), कास्कीले सेवाग्राही एवं कर्मचारीहरुको लागि उपयोगी हुने गरी तयार गरेको जानकारीमूलक प्रचारसामाग्री तथा ईन्फो स्टीकर कार्यालयहरुमा टाँस्न सुरु गरिएको छ ।

गण्डकी प्रदेशका मूख्यमन्त्री पृथ्वीसुब्बा गुरूङले एक समारोहका बीच स्टीकर टाँस गरी यस अभियानको सुरुवात गरे । गुरुङले कर्मचारी संगठनहरुले पेशागत हितको कार्य नगरी राजनीति मात्रै गर्ने हो भने यसको खारेज गर्नेसम्मको बहस सिर्जना हुनेतर्फ सचेत रहनुपर्ने बताए । नेपाल राष्ट्रिय कर्मचारी संगठनले गरेजस्ता रचनात्मक कार्य गर्ने हो भने मात्र ट्रेड युनियनहरु मौलिक रुपले अस्तित्वमा रहने उनको भनाई छ ।

मुख्यमन्त्री गुरुङले भने– ‘हो, यस्ता कार्यक्रम लिएर आउनुहोस् न, अनि पो म पनि खुशी भएर साथ दिन्छु ।’ गण्डकी प्रदेश सरकारको समृद्धिको अभियानमा कर्मचारीको महत्वपूर्ण सहयोग अवश्यक पर्ने जनाउँदै यस्ता खालका सूचना सामाग्रीले कर्मचारी र सेवाग्राही सबैलाई फाईदा पुग्ने बताए ।

निजामति कर्मचारिहरुको आधिकारिक ट्रेड युनियन कास्कीका अध्यक्ष भरत भुषालले जनप्रतिनिधि र कर्मचारीहरूको उचित सहकार्यल नै समृद्धि हासिल हुने बताए । आयोजक संस्थाका अध्यक्ष रामचन्द्र ढुंगानाले निकै मेहनत गरेर सामाग्रीहरु तयार गरिएको बताउंदै संगठनले राजनैतिक भन्दापनि रचनात्मक तथा व्यवसायिक कार्यक्रम गर्दै आईरहेको जानकारी गराए ।

सो कार्यक्रममा गण्डकी प्रदेश सरकारका प्रमुख सचिव हरि बस्याल, उच्च पदस्थ कर्मचारी, सुरक्षा निकायका पदाधिकारीहरु, नेराकमस गण्डकीका अध्यक्ष तारानाथ सुवेदी, संगठनका पदाधिकारीहरु, आधिकारिक ट्रेड युनियन कास्कीका सचिव लगायतको उपस्थिति थियो ।