मुस्ताङबाट पोखरा फर्केर पोखरा १४ स्थित मझेरी मञ्जिल पुगेका प्रधानमन्त्री वालेन्द्र शाहको फोटो भिडियो खिचेको भन्दै सुरक्षामा खटिएको नेपाली सेनाले पत्रकार सुरेश सुनारको क्यामेराबाट डिलिट गराएको छ ।

पर्यटनमन्त्री खडकराज (गनेस) पौडेलको निजी रिसोर्टमा बस्न जाने क्रममा प्रधानमन्त्री शाहको भिडियो मेरो साथी टीभीका पत्रकार सुरेश सुनारले आफ्नो क्यामेरामा कैद गरेका थिए ।

विजयपुर खोला किनारमा रहेको रिसोर्ट पारीपट्टी बसेर भिडियो खिचिरहेका सुनारलाई सेनाले गाडीमार्फत् आएर क्यामेराबाट भिडियो डिलिट गर्न लगाएका हुन् । रिसोर्टको गेटनेर पुगेर खिच्न खोज्दा नदिएपछि सुनार पारीपट्टी गएर खिच्न सुरु गरेका थिए ।

पत्रकार महासंघ कास्कीका अध्यक्ष माधव बरालले सार्वजनिक पद धारणा गरेका व्यक्तिका बारेमा सूसूचित गर्ने उद्देश्यले भिडियो खिच्दा नेपाली सेनाले नै हटाउनु प्रेस स्वतन्त्रता विरोधी कार्य भएको बताए । ‘प्रधानमन्त्री पनि सार्वजनिक व्यक्ति हुन्, रिसोर्ट पनि सार्वजनिक स्थल नै हो,’ उनले भने, ‘प्रधानमन्त्रीको पोखरा आगमनबारे रिपोर्टिङ गर्ने उद्देश्यले भिडियो खिच्दा सेनाले नै डिलिट गर्नु लोकतन्त्र र स्वतन्त्र प्रेसमाथिको प्रहार हो ।’

सेनाकै सुरक्षामा शुक्रबार प्रधानमन्त्री शाह आफ्नो परिवार र सचिवालयको टिमसहित निजी गाडीमा पोखरा हुँदै मुस्ताङ पुगेका थिए । उनीसँगै संस्कृति, पर्यटन तथा नागरिक उड्ड्यन मन्त्री खडकराज पौडेल (गनेस) पनि थिए । शुक्रबार उनीहरु कास्कीको अस्ताममा रहेको अन्नपूर्ण इको भिलेज लजमा बास बसेका थिए । त्यसपछि शनिबार बिहान मुस्ताङ बास बस्न पुगेका थिए । आइतबार उनी मुस्ताङबाट बागलुङ, पर्वत हुँदै पोखरा फर्किएका हुन् ।