तनहुँ । विश्वव्यापी महामारीको रुपमा फैलिएको कारोना भाइरस संक्रमण नियन्त्रण गर्न सरकारले लकडाउको समय बढाएसंगै तनहुँमा खाद्यान्न वितरण सुरु गरिएको छ ।

लगातार एकहप्ताभन्दा बढी समय लकडाउन भएको कारण दैनिक ज्यालादारी गर्ने गरिब विपन्न परिवारलाई समस्या हुन थालेपछि स्थानिय तहले खाद्यान्न वितरण सुरु गरेको हो ।

तनहुँको बन्दिपुर गाउँपालिकाले गाउँपालिका क्षेत्र अन्तर्गतका गरीब तथा विपन्न ५ सय १७ परिवारलाई खाद्यान्न वितरण गर्न सुरु गरेको हो । सोमबार र मंगबार खाद्यान्न वितरण गरिएको गाउँपालिका अध्यक्ष पुर्णसिं थापाले बताए ।

गाउँपालिकाको वडा नम्बर १ मा १ सय ८५, वडा नम्बर ४ मा १ सय ४८ र वडा नम्बर ५ मा १ सय १८४ गरि कुल ५ सय १७ परिवारलाई प्रति परिवार ३० किलो चामल वितरण गरिएको अध्यक्ष थापाले जानकारी दिए । अन्य बाकीँ ३ वटा वडाको तथ्याङ्क संकलन भैरहेकाले छिट्टै राहत वितरण गर्ने उनले बताए ।

साथै गाउँपालिकाले कोरोना भाइरस सम्बन्धि सचेतना समेत फैलाईरहेको गाउँपालिकाकी उपाध्यक्ष करुणा गुरुङले बताईन । अन्य वडा ग्रामीण वडा भएको हुदाँ सहरी क्षेत्रको तुलनामा कम खाद्यान्न वितरण हुने उनले बताईन ।