तनहुँ । तनहुँको एक स्थानीय तहले वितरण गरेको राहतको चामल सडेको भेटिएको छ । तनहुँको बन्दिपुर गाउँपालिकाले बाडेको राहतको चामल सडेको भेटिएको हो ।

बन्दिपुर गाउँपालिकाले वडा नं. ५ मार्फत कल्चोक क्षेत्रका ८ ज्यालादारी विपन्न परिवारलाई वितरण गरेको चामल सडेको भेटिएको हो ।

चामलमा ढुसी आएर रंग समेत कालो भएको र अमिलो गन्ध समेत आईसकेको राहत लिएका रेशम विकले बताए ।

चामललाई ३-४ पटक धुँदा पनि कालो नगएको र एक दुई छाक पकाएर खाँदा स्वादै अर्कै आएकाले कुखुरा र सुँगरलाई कुँडो बनाएर खुवाउन थालिएको विकले बताए ।

विक्रेताबाट लिइएको चामल गोदामको तल चिसो भागमा परेको हुँदा समस्या देखिएको बन्दिपुर गाउँपालिकाका अध्यक्ष पूर्णसिंह थापाले बताए । ‘गोदामको भुईमा रहेको ४ बोरा चामल सडेको रैछ ।’ अध्यक्ष थापाले भने ‘पसलमा गएर नयाँ चामल दिदैछौ ।’

वितरण गर्दा बोरा नखोली वितरण भएको हुँदा ४ बोरा चामल सडेको परेको बन्दिपुर गाउँपालिका वडा नम्बर ५ का अध्यक्ष ध्रुवप्रसाद लामिछानेले बताए ।

‘१५-१५ किलोको दरले ८ परिवार लाई दिइएको राहत चामल सडेको परेछ ।’ वडाअध्यक्ष लामिछानेले भने ‘बोरा नखोलि दिएका थियौ त्यही भएर वितरणको बेला थाहा भएन ।’ उनले थपे ‘अरुमा केही समस्या छैन ।’

साथै उक्त चामल फिर्ता गरी आजै अर्को राम्रो चामल वितरण गरिने वडाअध्यक्ष लामिछानेले बताए ।