कमला राना मगर, नवलपुर । नवलपुर (पूर्वी नवलपरासी) का पहिलो कोरोना संक्रमित भारतबाट अवैध बाटो हुँदै आएको खुलेको छ । उनी रक्सौल हुँदै गत वैशाख ३० गते जिल्ला आएको पाइएको स्वास्थ्य कार्यालय नवलपरासी (बर्दघाट सुस्ता पुर्व)ले जनाएको छ ।

ट्रक चढेर नवलपुर पुगेका उनलाई वडाध्यक्ष दिनेश भुषाल सहित स्थानियले भारतबाट आएको थाहा पाएपछि सोही दिन प्रहरीको सहयोगमा चितवनको भरतपुरस्थित कोरोना अस्पताल पठाइएको थियो ।

उनी भारतको कलकत्तामा बस्दै आएको खुल्न आएको भरतपुर कोरोना विशेष अस्पतालका प्रमुख मेडिकल सुपरिटेन्डेन्ट श्रीराम तिवारीले जानकारी दिए ।

लकडाउन लम्बिएपछि उनी सीमासम्म कतै हिँडेर र कतै गाडीमा आइपुगेका थिए ।

उनका अनुसार उनको स्वाब बिहीबार परीक्षण भएकोमा कोरोना संक्रमण पुष्टि भएको हो । अहिले उनी अस्पतालकै आइसोलेसन कक्षमा रहेको र अवस्था सामान्य रहेको जानकारी दिए ।

संक्रमित व्यक्ति देवचुली नगरपालिका–१२ का ४९ वर्षीय पुरुष रहेको पनि उनले जानकारी दिए ।

योसँगै गण्डकी प्रदेशमा कोरोना संक्रमितको संख्या ३ पुगेको छ । यसअघि विदेशबाट आएका बागलुङका दुई जनामा कोरोना पुष्टि भएको थियो भने उनीहरु निको भइसकेका छन् ।

शुक्रबार नवलपुरमा एक जना थपिएसँगै नेपालमा कोरोना संक्रमण पुष्टि हुनेको संख्या २४६ पुगेको स्वास्थ्य मन्त्रालयले जनाएको छ ।

पूर्वी नवलपरासीको देवचुलीमा एक जनामा कोरोना पुष्टि, संक्रमितको संख्या २४६ पुग्यो