कास्कीमा क्रियाशील पत्रकारहरुको कोरोना बीमा गर्न सुरु गरिएको छ । नेपाल पत्रकार महासंघ, कास्की शाखाले मुलुकमा कोरोनाको संक्रमण बढेसंगै महासंघमा आबद्ध पत्रकारहरुको कोरोना बीमा गर्न सुरु गरेको हो । महासंघमा आबद्ध साधारण सदस्यहरुको महासंघले र अन्य सक्रिय पत्रकारको सम्बन्धित मिडिया हाउसले कोरोना बीमा गर्न सुरु गरेका हुन् ।

मंगलबार महासंघमा आवद्ध भएका सदस्यहरुको एक सय भन्दा बढीको कोरोना बीमा गरिएको महासंघ कास्कीका अध्यक्ष दीपेन्द्र श्रेष्ठले बताए । अन्य सदस्यहरुको बुधबार पनि कोरोना बीमा गरिने भएको उनले जनाए ।

सिद्धार्थ ईन्स्योरेन्स कम्पनीसंग महासंघले कोरोना बीमा सम्झौता समेत गरेको छ । बीमकको तर्फबाट सिद्धार्थ ईन्स्योरेन्स कम्पनी पोखराका शाखा प्रमुख गोबिन्द प्रसाद देवकोटा र बीमितको तर्फबाट नेपाल पत्रकार महासंघ कास्की शाखाका अध्यक्ष दीपेन्द्र श्रेष्ठले सम्झौता पत्रमा दस्तखत गरेका हुन्।

साक्षीमा भने महासंघ कास्कीका सहसचिव दीननाथ बराल र सिद्धार्थ ईन्स्योरेन्सका अमिर बराल रहेकाछन्। कोरोना बीमा बापत महासंघले प्रति व्यक्ति ६ सय उक्त कम्पनीलाई उपलब्ध गराउनेछ । बीमा पश्चात् १५ दिनपछि पत्रकारमा कोरोना पुष्टि भएमा कम्पनीले नियम अनुसार एक लाख रुपैया उपलब्ध गराउनेछ ।

महासंघ कास्कीको सोमबार आयोजना भएको अनलाइन मिटिङले महासंघका सदस्य पत्रकारहरुको कोरोना बिमा गर्ने निर्णय गरेको थियो । महासंघ कास्कीमा करिब ३ सय पत्रकार आवद्ध रहेको सचिव रामप्रसाद तिमिल्सिनाले जनाए । पोखराका केही संचार माध्यमहरुले भने केही दिन अघि नै आफ्ना पत्रकार सहित कर्मचारीहरुको कोरोना बीमा गराएका छन्। बाँकीको गर्न महासंघले अनुरोध समेत गरेको छ ।

तमु धीं यूकेको १ लाख ८० हजार सहयोग

पत्रकार महासंघ कास्कीले तमु धीं एशोसियसन यूकेको सहयोगमा कोरोना बीमा सुरु गरेको हो । तमु धिँ यूकेले प्रति पत्रकार ६ सय रुपैंयाको बीमा गर्न १ लाख ८० हजार रुपैंया पठाएको अध्यक्ष श्रेष्ठले जानकारी दिए ।

केही मिडिया हाउसले आफ्ना पत्रकारहरुको बीमा गरिसकेकाले बाँकी रकम फोनिज कास्कीलाई दिने सोच समेत बनाएको उनले बताएका छन् । जसबाट महासंघमा आबद्ध नभएका सक्रिय जनजाति पत्रकार लाभान्वित हुनेछन् । उनले पत्रकारहरुलाई आवश्यक मास्क र सेनिटाइजर समेत महासंघले उपलब्ध गराउँदै आएको र सुरक्षित रुपमा जिम्मेवार पत्रकारिता गर्न आग्रह समेत गरेका छन् ।

तमु धीं एशोसियसन युकेका अध्यक्ष नन्दजङ्ग गुरुङले कोभिड १९ को जोखिमको बेला कार्यरत पत्रकारहरुका लागि तमु धींले सहयोग गरेको बताएका छन् । बेलायतमा २० वर्ष अघि स्थापना भएको तमु धी एशोसियसन युकेले त्यहाँका तमु समुदायसँगै पोखरामा समेत विभिन्न समाजसेवामूलक कार्यक्रम, खेलकुदको क्षेत्रमा योगदान पु¥याउँदै आएको छ ।