तनहुँ । तनहुँको व्यास नगरपालिकाले पहेँलो कार्ड प्राप्त अपाङ्गता भएका व्यक्तिलाई शुक्रबार प्रोत्साहन भत्ता वितरण गरेको छ ।

व्यास नगरपालिकाका वडा नम्बर १ देखि ४ सम्मका पहेँलो कार्ड प्राप्त व्यक्तिलाई प्रोत्साहन रकम प्रदान गरिएको नगरपालिकाले जनाएको छ ।

नेपाल सरकारले ‘ग’ वर्ग अथवा पहेँलो कार्ड प्राप्त व्यक्तिलाई प्रोत्साहन रकम नदिने निर्णय गरेतापनि व्यास नगरपालिकाले भने भत्ता दिन शुरु गरेको हो ।

व्यास नगरपालिकाका प्रमुख वैकुण्ठ न्यौपाने र उपप्रमुख एवं स्थानीय समन्वय समितिका संयोजक मिरा जोशीले प्रतिव्यक्ति दुई हजार पाँच सय रुपैयाँका दरले प्रोत्साहन रकम वितरण गरेका हुन ।

सरकारले ‘क’ र ‘ख’ वर्गमा परेका व्यक्तिहरुलाई मात्र प्रोत्साहन रकम दिने निर्णय गरेको छ ।

तर, व्यासले भने नगरपालिकाको कोषबाट पहेँलो कार्ड प्राप्त अपाङ्गता भएका व्यक्तिलाई प्रोत्साहन रकम उपलब्ध गराएको व्यास नगरपालिकाका प्रमुख वैकुण्ठ न्यौपानेले बताए ।

नेपाल सरकारले ‘क’ वर्गको रातो र ‘ख’ वर्गको निलो कार्ड प्राप्त अपाङ्गता भएका व्यक्तिहरुलाई मात्रै सामाजिक सुरक्षा भत्ता वितरण गर्दै आइरहेपनि व्यास नगरपालिकाले पाचौं नगर सभाबाट पारित गरे अनुरुप ‘ग’ वर्गका पहेंलो कार्ड प्राप्त व्यक्तिहरुलाई पनि प्रोत्साहन रकम प्रदान गरेको नगरपालिकाले जनाएको छ ।

नगरपालिकाभित्रका १३३ जनाले पहेँलो कार्ड लिएका छन् भने शुक्रबार १९ जनालाई प्रति व्यक्ति वार्षिक दुई हजार पाँच सय रुपैयाँका दरले प्रोत्साहन रकम वितरण गर्न थालिएको व्यास नगरपालिका महिला तथा बालबालिका शाखाका कार्यालय सहायक मुना तामाङले बताईन ।

साथै जेठ ३२ गते व्यासका १३ र १४ नम्बर वडा, असार १ गते १०, ११ र १२ नम्बर वडा, असार २ गते ५ र ६ तथा असार ३ गते ७, ८ र ९ नम्बर वडाका पहेँलो कार्ड प्राप्त अपाङ्गता भएका व्यक्तिलाई प्रत्येक वडा कार्यालयबाट वितरण गरिने तामाङले जानकारी दिईन ।

रातो र निलो कार्ड प्राप्त फरक क्षमताका व्यक्तिहरुलाई भने सरकारले उपलब्ध गराएको रकम वितरण गर्दै आएको छ ।