बलिउड नायक संजय दत्तलाई तेश्रो चरणको क्यान्सर भएको छ । उनलाई फोक्सोको क्यान्सर भएको हो । ६१ वर्षीय संजय दत्त उपचारका लागि अमेरिका गएका छन् ।

उनी गत ८ अगष्टदेखि स्वास फेर्न गाह्रो भएपछि मुम्बईस्थित लीलावती अस्पताल भर्ना भएका थिए । उनको कोरोना रिपोर्ट पनि नेगिटिभ आएको थियो ।मंगलबार राति मात्र संजय दत्तले आफ्ना नजिकका मित्रलाई यसको खुलासा गरेका थिए ।

भारतीय मिडियाका अनुसार, क्यान्सरको खबरले संजय स्तब्ध बनेका छन् । उनले तेश्रो स्टेजको क्यान्सरको उपचारका लागि केही समय अस्पतालमा विताउनुपर्नेछ । उनी, आफू निको हुनेमा आशावादी छन् ।

संजयको यो रिपोर्ट सार्वजनिक भएपछि सलमान खान, अमिताभ बच्चन, अभिषेक बच्चन लगायतका नायकले फोन गरेका थिए तर उनले फोन नउठाएको भारतीय मिडियामा उल्लेख छ ।

उनकी आमा नर्गिस र पहिली श्रीमती ऋचा शर्माको पनि क्यान्सरबाट ज्यान गएको थियो ।यो बर्ष बलिउडमा नायक ऋषि कपुर र इरफान खानको निधन क्यान्सर रोगकै कारण भएको थियो ।

संजयले मंगलबार दिउँसो सामाजिक संजालमा ट्विट गर्दै आफूले केही समयका लागि कामबाट ब्रेक लिन लागेको जानकारी दिएका थिए । उनले, आफ्नो साथमा आफ्नो परिवार रहेको भन्दै कुनै पनि खालको अड्कलवाजी नगर्न पनि फ्यानहरुसँग आग्रह गरेका थिए । उनले ‘फिल्मबाट ब्रेक लिएको’ बताएका थिए ।

उनले जुलाई २९ मा आफ्नो ६१ औं जन्मोत्सव मनाएका थिए । उनको सन् १९५९ मा जन्म भएको थियो । उनले २००८ मा तेस्रो बिहे गरेका थिए । उनको पछिल्लो फिल्म ‘सडक २’ २८ अगष्टमा सार्वजनिक हुँदैछ ।