पोखरामा कोरोनाबाट मृत्यु भएकी महिलाको ठेगाना पोखरा वडा नं. ११ नभएको त्यहाँका वडाअध्यक्ष मोहनप्रसाद बाँस्तोलाले स्पष्ट पारेका छन् ।

उनले भनेका छन् – ‘प्रवाह भएको सूचना गलत छ । मृतक महिला वडा नं. १२ मार्फा थकाली समाजको आडमा घर भएकी महिला हुन् । उनी हाम्रो वडाकी होइन ।’ पोखरामा विहीबार कोरोना संक्रमणका कारण तेस्रो व्यक्तिको ज्यान गएको हो । पोखरा स्वास्थ्य विज्ञान प्रतिष्ठान (पश्चिमान्चल) अस्पतालका निर्देशक डा. अर्जुन आचार्यले विज्ञप्ती जारी गर्दै महिलाको ठेगाना पोखरा ११ भएको जानकारी दिएका थिए ।

मृत्यु भएकी ३२ वर्षीया महिला दीर्घ रोगी थिइनन् । तर उनी पछिल्लो समय निमोनियाबाट ग्रसित थिइन् । उनको कुनैपनि ट्राभल हिष्ट्री पाइएको छैन । उनी साइ अर्चना, मणिपाल, कास्की सेवा हुँदै पोखरा स्वास्थ्य विज्ञान प्रतिष्ठानको कोभिड विशेष कक्षमा पगेकी थिइन् । यसअघि सेवा हस्पिटलमा कोरोना भाइरसबाटै भदौ १ गते ज्यान गुमाउने तनहुँकी महिलासँगै एउटै वार्डमा उनी बसेको खुलेको छ । त्यसपछि स्वाब परिक्षण गर्दा सेवा हस्पिटलका एक जना नर्स र आज मृत्यु हुने महिलामा कोरोना संक्रमण पुष्टि भएको थियो ।

प्रतिष्ठानको कोभिड १९ उपचार केन्द्रमा कोरोनाबाट हालसम्म ५ जनाले ज्यान गुमाएका छन् । केन्द्रमा यस अघि कोरोना संक्रमित पोखरा – १६ का ८७ वर्षीय बृद्ध र पोखरा (१९ का ६२ वर्षीय पुरुषको मृत्यु भएको थियो । स्याङजाका २ संक्रमित पुरुषको समेत केन्द्रमा उपचारका क्रममा निधन भएको थियो ।

यस बाहेक पोखराको कास्की सेवा हस्पिटलमा उपचाररत तनहुँ की ५० वर्षीया महिलाको पनि भदौ २ गते कोरोनाका कारण मृत्यु भएको थियो । पोखरामा ३ र गण्डकी प्रदेशमा कोरोनाबाट ज्यान गुमाउनेको संख्या ९ पुगेको छ ।