तपाईंलाई तत्काल प्रहरीको सहयोग चाहियो ? अब तपाईंले आफ्नो मोबाइलबाटै घटना विवरण, आँखा अगाडि देखिएका तस्विरसहित प्रहरीलाई सूचना दिन सक्नुहुनेछ ।
प्रहरी प्रधान कार्यालयले प्रहरीको काम कारवाहीलाई प्रविधिमैत्री बनाउने उद्धेश्यले ‘पाइलट प्रोजेक्ट’का रुपमा ‘नेपाल पुलिस मोबाइल एप’ सञ्चालनमा ल्याएको छ । ‘नेपाल पुलिस मोबाइल एप’ तीन जिल्लाबाट एकसाथ बिहीबार सार्वजनिक गरिएको हो । गण्डकी प्रदेशमा पहिलोपटक कास्कीमा लञ्च गरिएको छ । कास्कीसँगै मोरङ र ललितपुर जिल्लामा एप सञ्चालन हुनेछ । जिल्ला प्रहरी कर्यालय कास्कीले आज ‘भिडियो कन्फ्रेन्स’ मार्फत पत्रकार सम्मेलन गरी एप लञ्च गरेको छ ।
समुदायमा घट्ने आपराधिक क्रियाकलाप, घटना तथा सूचनालाई छिटो छरितो र प्रविधियुक्त तवरबाट सम्बोधन गरी थप क्षति हुन नदिन तथा अपराधीलाई तत्काल नियन्त्रण गर्न प्रहरी प्रधान कार्यालयले विकास गरेको सो एपले सघाउने विश्वास सहित सञ्चालनमा ल्याइएको हो ।
जिल्लाको समग्र शान्ति सुरक्षा तथा अमनचयन कायम राख्ने उदेश्यले थप सूचनाको माध्यमका रुपमा एप गण्डकी प्रदेशमै पहिलो पटक शुभारम्भ गरिएको जिल्ला प्रहरी कार्यालयका प्रमुख एवं प्रहरी उपरीक्षक जीवनकुमार श्रेष्ठले बताए ।
‘यो तुरुन्त रेस्पोन्सका लागि प्रभावकारी हुनेछ,’ एसपी श्रेष्ठले भने, ‘कुनै पनि घटना भयो भने त्यहाँको अडियो, फोटो, भिडिओ र त्यससम्बन्धी विवरण लेखी एपबाटै प्रहरीकहाँ सूचना दिन सकिन्छ ।’
नागरिक स्तरबाट प्राप्त हुने सूचनाको श्रोत गोप्य रहने उनको भनाई छ । प्रहरी प्रधान कार्यालयबाटै समेत हेर्न र नियन्त्रण गर्न सकिने उनले जनाए । यसका लागि प्रविधिमा पोख्त टोली खटाइएको पनि श्रेष्ठले जानकारी दिए ।
सर्वसाधारणले घटनाका बारेमा आफू रहेकै स्थानबाट प्रहरीलाई जानकारी गराउन सक्ने र प्रहरी कार्यालयसम्म आउनुपर्ने बाध्यता नहुने भएकाले समयको समेत बचत हुनेछ ।
घरेलु हिंसा, लुटपाट चोरी, ज्यानसम्बन्धी, सवारी दुर्घटना, ठगी, यौनजन्य अपराध, लागुऔषध, मानिस हराएको, हातहतियार तथा विष्फोटक पदार्थ सम्बन्धी जानकारीका बारेमा प्रहरीलाई सो माध्यबाट रिर्पोटिङ गर्न सकिने व्यवस्था गरिएको छ ।
त्यसैगरी नजिकको प्रहरी कार्यालयका सम्पर्क नम्वर, प्रहरी सन्देश तथा समाचार, आपत्कालिन सम्पर्क नम्बर एप्समा समावेश गरिएको छ ।
आइटी विभाग हेर्ने प्रहरी निरीक्षक गजेन्द्र आचार्यले एप प्रयोग विधिबारे जानकारी गराएका थिए । एप एन्ड्रोइड र आइओएस दुबै भर्सनमा उपलब्ध रहेको उनले बताए । गुगल प्लेस्टोरबाट सो एप डाउनलोड गरी सञ्चालन गर्न सकिनेछ ।
सम्बन्धित खबर
‘रास्वपाका नेताहरु घर-घरमा पुगेर सहकारी पीडित बचतकर्तालाई भड्काए’ [विज्ञप्ति]
पर्यटकको चाप बढ्न नसक्दा पोखराका पर्यटन व्यवसायी चिन्तित
पोखराको सहिदचोकमा प्रहरीको पेट्रोल पम्प निर्माण रोक्न अन्तरिम आदेश
एमाले कास्कीले शुभकामना आदानप्रदान तथा चियापान गर्ने
रास्वपाको आज पनि पोखरामा विरोध प्रर्दशन
‘सडकमा भीड उतारेर अनुसन्धान प्रभावित पार्ने काम स्वीकार्य हुँदैन’ – नागरिक समाज पोखरा
यो पनि पढौँ
पोखराको हेम्जामा यात्रु चढाइरहेको बसलाई टिप्परले ठक्कर दियो
आजदेखि लाइसेन्स बोक्न नपर्ने, मोबाइलबाट ट्राफिकले कारबाही गर्न सक्ने
पर्यटन व्यवसायी मिश्रको डेंगु संक्रमणबाट निधन
स्याङ्जामा पूर्वसैनिकको घरमा सकेट बम विष्फोट, पुरी घाइते