पोखरा – आइतबार बिहानै पोखराका तीन सहित गण्डकीमा पांच जना कोरोनाका संक्रमित थपिएका छन् ।

स्वास्थ्य निर्देशनालयको आइतबार बिहानको पहिलो अद्यावधिक विवरण अनुसार प्रदेशका दुई जिल्ला कास्की र नवलपुरमा गरी कूल पांच जना कोरोना संक्रमित थपिएका हुन् ।

पोखरा स्वास्थ्य विज्ञान प्रतिष्ठानमा गरिएको पीसीआर परीक्षणमा कास्कीको पोखरा महानगरपालिका वडा नं -७ का ३७ वर्षीय महिला र ५३ वर्षीय पुरुषका साथै पोखरा -८ का ३८ वर्षीय पुरुषमा कोरोना संक्रमण पुष्टि भएको निर्देशनालयले जनाएको छ ।

यस्तै भरतपुर अस्पताल चितवन र राष्ट्रिय जनस्वास्थ्य प्रयोगशाला काठमाण्डौमा गरिएको परीक्षणमा नवलपुर कावासोती २ का २१ वर्षीया युवती र मध्यविन्दु ४ का २० वर्षीया युवतीको परीक्षण रिपोर्ट पोजेटिभ आएको निर्देशनालयका प्रमुख डा. विनोद विन्दु शर्माले जानकारी दिए  । यो संगै गण्डकीमा कोरोना संक्रमितको कूल संख्या २०९९ पुगेको छ ।

नवलपुरका पुरुष संक्रमितको मृत्यु   

गण्डकीमा कोरोना संक्रमणका कारण थप एक जनाको मृत्यु भएको छ  ।

जिल्लाको बिनयत्रिबेणी गाउँपालिका -६ का ६२ वर्षीय पुरुष संक्रमितको मृत्यु भएको स्वास्थ्य निर्देशनालयले पुष्टि गरेको छ ।

भरतपुरस्थित चितवन मेडिकल कलेजमा उपचाररत ती पुरुषको उपचारकै क्रममा मृत्यु भएको हो ।

पछिल्लो चार दिन यता गण्डकीमा लगातार कोरोना संक्रमित मृत्यु भैरहेको छ । यो, संगै गण्डकीमा कोरोना संक्रमणकै कारण ज्यान गुमाउनेको संख्या १३ पुगेको छ ।