तनहुँ । जिल्ला प्रशासन कार्यालय तनहुँले भानु नगरपालिकामा थप १० दिन निषेधाज्ञा जारी गरेको छ ।

जिल्ला सङ्कट व्यवस्थापन केन्द्र तनहुँको आइतबार बसेको बैठकले नगरपालिकाका सम्पूर्ण क्षेत्रमा थप १० दिनका लागि निषेधाज्ञा जारी गरेको हो ।

समुदाय स्तरमा कोरोनाको संक्रमण बढ्न थालेपछि निषेधाज्ञा थपिएको प्रमुख जिल्ला अधिकारी सागर आचार्यले बताए ।

उनले भने ‘कोरोनाको जोखिम बढ्दै गएकाले भानु नगरपालिकामा भदौ १५ गतेदेखि २४ गते राति १२ बजे सम्म निषेधाज्ञा जारी गरिएको हो ।’

यसअघि भानु नगरपालिकामा भदौ १ गतेदेखि १४ गते राति १२ बजेसम्म निषेधाज्ञा जारी थियो ।

यी हुन संचालन गर्न पाइने

निषेधाज्ञा अवधिमा अत्यावश्यक सेवा, स्वास्थ्य सेवा, सरसफाई सेवा र विपद व्यवस्थापन सेवासँग सम्बन्धित कार्यहरु भने सञ्चालन गर्न पाइनेछ ।

त्यस्तै राष्ट्रिय राजमार्गमा सञ्चालन हुने सवारी साधन, सरकारी कार्यालय र सार्वजनिक निकायका नियमित कार्य, स्वास्थ्य सुरक्षाको मापदण्ड अपनाई, भौतिक दूरी कायम गरी सञ्चालन गर्ने औषधि र औषधिजन्य पसल, खाद्य सामग्री पसल, फलफूल, तरकारी र दुग्धजन्य पसल, एम्बुलेन्स, शववाहन, खाद्य ढुवानी, औषधि, फलफूल, कुखुराको चल्ला, मासु, तरकारी, दुग्ध पदार्थ, पानी र इन्धन बोकेका सवारी साधन, कुटनीतिक नियोग र झण्डावाला सवारी साधन, सरकारी नम्बर प्लेटका र जिल्ला प्रशासन कार्यालयबाट सवारी पास प्राप्त सवारी साधनहरु सञ्चालन हुनेछन ।

के के हुन संचालन गर्न नपाइने ?

निषेधाज्ञा अवधिभर अत्यावश्यक सेवा बाहेकका नियमित सेवा, बैंक तथा वित्तीय संस्थाबाट प्रदान गरिने बाह्य सेवा, सामाजिक सङ्घसंस्थाले सञ्चालन गर्ने कोभिड नियन्त्रण एवं स्वास्थ्य सुरक्षा बाहेक अन्य कार्य र उद्योग, कलकारखाना र अन्य व्यवस्थापन बन्द रहनेछन् ।

निषेधाज्ञा अवज्ञा गरे सङ्क्रामक रोग ऐन, २०२० को दफा ३ र स्थानीय प्रशासन ऐन, २०२८ को दफा ६ को उपदफा ३ बमोजिम कारवाही गरिने प्रशासन कार्यालयले जनाएको छ । आज आइतबार बिहान भानु नगरपालिकामा समुदायका २२ जनामा कोरोना संक्रमण पुष्टि भएको थियो ।