नवलपुर – गण्डकी प्रदेशमा कोरोना संक्रमणका कारण ज्यान गुमाउनेको संख्या २२ पुगेको छ ।

स्वास्थ्य निर्देशनालयका अनुसार गण्डकी प्रदेश अन्तर्गत नवलपुरको देवचुली नगरपालिका वडा नं १ बस्ने ६४ वर्षीय पुरुषको कोरोना संक्रमणका कारण मृत्यु भएको छ  ।

केही समय देखि मिर्गौला खराब भएर डाएलासिस गराइरहेको ती पुरुषको कोरोनाको परीक्षण गरिएकोमा गत भाद्र १९ गते पोजेटिभ रिपोर्ट आएको थियो । संक्रमणको लक्षण सहित खोकी र श्वासप्रश्वासमा समस्या देखिएपछि उनलाई चितवनको भरतपुरस्थित कोरोना अस्पतालको आइसीयुमा भर्ना गरिएको थियो  ।

अस्पतालमा उपचाररत रहंदा उनको स्वास्थ्य अवस्था जटिल बन्दै गएपछि भेन्टिलेटर सहित उपचारका सबै उपायहरु गर्दागर्दै मंगलबार साँझ ५:३० बजेको समयमा मृत्यु भएको थियो । मृतक ती पुरुषमा निमोनियाको संक्रमण पनि रहेको अस्पतालले जनाएको छ ।

मंगलबार मात्रै पोखरा १० कि एक महिलाको कोरोना संक्रमणबाट मृत्यु भएको थियो ।