तनहुँ । तनहुँको भानु नगरपालिका-३ स्थित तुर्लिङकोटमा एउटा चितुवा खोरमा परेको छ ।

उक्त खोरमा परेको चितुवालाई डिभिजन बन कार्यालय तनहुँको टोलिले नियन्त्रणमा लिएको छ । डिभिजन बन कार्यालय तनहुँले थापेको खोरमा परेको चितुवालाई शुक्रबार बिहान नियन्त्रण लिइएको डिभिजन वन कार्यालय तनहुँले जनाएको छ ।

३/५ दिन पहिले थापिएको खोरमा चितुवा परेको डिभिजन वन कार्यालय तनहुँका प्रमुख कोमल राज काफ्लेले बताए । फलामेखोरमा नै यसपाली चितुवा परेको काफ्लेले बताए ।

‘स्थानीयको कुखुराको खोरमा पसेर कुखुरा मार्न थालेपछि हामीले उक्त स्थानमा खोर राखेका थियौं’ प्रमुख काफ्लेले भने ‘सोही खोरमा चितुवा परेको रहेछ ।‘

शुक्रबार बिहान नियन्त्रणमा आएको चितुवा करिब ३/४ वर्षको पोथी रहेको डिभिजन वन कार्यालय तनहुँले जनाएको छ । उक्त चितुवा शारीरिक रुपमा अशक्त रहेको प्रमुख काफ्लेले जानकारी दिए ।

स्थानीय सन्तबहादुर तामाङको कुखुराको खोरमा छिरेर गत साउन १८ र १९ गते खोरमा रहेको ४ सय भन्दाबढी कुखुरालाई आक्रमण गरेर घाइते बनाएको थियो ।

उक्त आक्रमणपछि तामाङले डिभिजन वन कार्यालय तनहुँमा क्षतिपूर्तिसहित चितुवा नियन्त्रणका लागि निवेदन दिएका थिए ।

अहिलेसम्म जिल्लाको भानु नगरपालिकामा ७ वटा, व्यास नगरपालिकामा एउटा, बन्दिपुर गाउँपालिकामा एउटा गरी ९ वटा चितुवा नियन्त्रणमा आइसकेको डिभिजन वन कार्यालय तनहुँले जनाएको छ । यस्तै जिल्लामा पाँचवटा चितुवा मृत फेला परेका छन् l

भिडियो हेर्नुस :

https://www.youtube.com/watch?v=lCX4u-X551k