गत साउन २८ गते राति घरमै सुतिरहेको अवस्थामा बिषालु सर्प कालो करेतले डसेपछि अस्पतालमा भर्ना भएका कास्कीको मादी गाउँपालिका–६ तप्राङका गङ्गाधर पौडेलका १३ वर्षीय छोरा विशाल पौडेलको डेढ महिनापछि होस खुलेको छ । तर उनले बोल्न सकिरहेका छैनन् भने आँखामा पनि दृष्टि क्षमता आइसकेको छैन ।

उपचारमा रकम अभाव भएपछि परिवारले सहयोगको याचना गरेका छन् । उनको पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा उपचार शुरु गरिएकोमा उपचार प्रक्रिया लम्बिदै जाँदा रकम अभाव भएपछि ढिलो गरी काठमाण्डौ लैजान सकिएको थियो । परिवारले सहयोगका लागि आग्रह गरेका हुन् । अहिले स्थानियले विशाल बचाऊँ अभियान नै जारी राखेर सहयोग संकलन गरिरहेका छन् ।

दाजु महादेव पौडेलले विशालको अवस्था बल्ल अलिकति सुधार भएको बताए । बालक पौडेल महारुद्र मावि तप्राङमा कक्षा आठमा अध्ययनरत छन् । उनी कोमाबाट १९ दिनपछि फर्किएका थिए । तर, बोल्न सकेका छैनन् । रकम जुटाउन सकेमा आफ्नो भाइलाई बचाउन सक्नेमा ढुक्क थिए तर रकम जोहो गर्न नै उनलाई हम्मे हम्मे परेको छ ।

पोखरामै १० लाख खर्च भइसकेको थियो । काठमाण्डौ न्यूरो हस्पिटलमा लैजान सुझाव दिइएकोमा त्यहाँ ५०, ६० लाख लाग्ने अनुमान गरिएको र त्यो भन्दा सस्तो शिक्षण अस्पताल भएर त्यहाँ लगिएको हो । दाजु महादेव गाउँमै कुखुरा पालन गर्दै आएका थिए । घरको आर्थिक अवस्था पनि निम्न रहेकाले अहिले उपचारमा समस्या भएको हो ।

रकम अभावले नै एउटा बालकको ज्यान जोखिममा नपरोस् भन्न चाहनुहुन्छ भने अभियानका संयोजक रवि क्षेत्रीलाई 9856004425, सहसंयोजक विकास क्षेत्रीलाई 9846507511, भिनाजु सन्तोष अधिकारीलाई 9856083954, दाइ महादेव पौडेललाई 9803260307 र दाइ विजय पौडेललाई 9856011008 सम्पर्क गरी सहयोग गर्न सक्नुहुनेछ ।