पोखरा – गएराती पोखराको बुलौंदीस्थित सडक डिभाईडरमा मोटरसाइकल ठक्कर खाँदा एक व्यक्तिको मृत्यु भएको छ ।

हल्लनचोकबाट जिरोकिलोमिटर तर्फ जाँदै गरेको ग १६ प ५०६ नम्वरको मोटरसाइकल राती अन्दाजी १ :३० बजेको समयमा पोखरा महानगरपालिका -६ बुलौंदीस्थित डिभाईडरमा ठक्कर खाँदा स्याङ्गजा जिल्ला बिरुवा गाउँपालिका ८ घर भइ हाल पोखरा -१५ नयाँगाउँ बस्दै आएका दिलिप गुरुङको मृत्यु भएको कास्कीका प्रहरी नायव उपरीक्षक तथा प्रहरी प्रवक्ता सुवास हमालले गण्डक न्युजलाई जानकारी दिए ।

हमालका अनुसार मोटरसाइकल अनियन्त्रित भइ सडकको डिभाईडरमा ठोक्किएर दुर्घटना भएको हो । टाउको र छातीमा गम्भीर चोटलागेका गुरुङलाई सोही स्थानमा खटिएका प्रहरी निरीक्षक रामभक्त भट्टराईको कमाण्डमा खटिएको प्रहरीको टोलीले तत्काल उपचारका लागि गण्डकी मेडिकल कलेज लगेपनि उपचारका क्रममा राती २:३५ बजे उनको मृत्यु भएको थियो ।

गुरुङका आफन्तका अनुसार खाना खाइसकेपछी हावा खान भन्दै कोठाबाट निस्किएका उनी ट्याक्सीलाई ओभरटेक गर्ने क्रममा नियन्त्रण गुमाउँदा डिभाईडरमा ठोक्किन पुगेका हुन् ।

घटनाका सम्बन्धमा आवश्यक अनुसन्धान भैरहेको प्रवक्ता हमालले जानकारी दिए ।