पोखरा । प्रतिनिधिसभा सदस्य सूर्यबहादुर केसीको निधन भएपछि नेपाली कांग्रेसका तर्फबाट प्रतिनिधि सभामा उक्त पद रिक्त छ । रिक्त समानुपातिक सांसदमा स्याङ्जाका मोहनप्रसाद पाण्डेले अवसर पाउने भएका छन् । केसी खस आर्य कोटाबाट सांसद समानुपातिक सांसद बनेका थिए ।

निर्वाचन आयोगमा कांग्रेसले बुझाएको समानुपातिकको बन्दसूचीमा केसीपछि पाण्डेको नाम रहेकोले उनले अवसर पाउने पक्का भएको हो । त्यतिबेला उनी स्याङ्जा क्षेत्र नम्बर ३ बाट निर्वाचित भएका हुन् । केसीको गत सोमबार निधन भएको थियो ।

२०७४ को आम निर्वाचनमा कांग्रेसबाट खस आर्य पुरुषमध्ये पाँच जना सांसद बनेका थिए । त्यतिबेला पाण्डेको नाम छैठौं नम्बरमा थियो ।

पाण्डे को हुन् ?

कालीगण्डकी गाउँपालिका, स्याङ्जाका पाण्डे पहिलो संविधानसभाका सभासद हुन् । २०६४ को संविधानसभा निर्वाचनमा उनी प्रत्यक्ष निर्वाचन प्रणालीतर्फ स्याङ्जा–३ बाट निर्वाचित भएका थिए ।

२०३६ सालदेखि विद्यार्थी राजनीतिमा लागेका उनी २०४८ सालमा कांग्रेस केन्द्रीय सदस्य बनेका थिए । २५ मंसिर २०१९ सालमा जन्मेका पाण्डेले व्यवस्थापनमा स्नातक उत्तीर्ण गरेका छन् ।

केसीको निधन भएका कारण बन्दसूचीमा उनीपछि नाम रहेका पाण्डे सांसद बन्ने पक्का भएको निर्वाचन आयोगले जनाएको छ । आयोगका अनुसार संघीय संसद सचिवालयबाट स्थान रिक्त रहेको औपचारिक जानकारी आएपछि मात्रै प्रक्रिया अगाडि बढ्छ ।