पोखरा – सोमबार पोखराका ६८ सहित गण्डकीका थप ८६ जनामा कोरोना पुष्टि भएको छ ।

स्वास्थ्य निर्देशनालयले आज जारी गरेको विज्ञप्ति अनुसार गण्डकीका २१२ जनामा गरिएको परीक्षण मध्ये थप ८६ जनाको रिपोर्ट कोरोना पोजेटिभ आएको हो ।

आज थपिएका संक्रमित प्रदेशका चार जिल्लाका छन् । जसमा कास्कीको पोखरा महानगरका ६८, तनहुँमा ६, नवलपुरमा १० जना र स्याङ्गजाका २ जनाको परीक्षण रिपोर्ट कोरोना पोजेटिभ आएको जारी विज्ञप्तिमा जनाइएको छ । आज कास्कीका १३५ जनाको नमुना परीक्षण गर्दा ६८ जनाको रिपोर्ट पोजेटिभ आएको छ ।  पछिल्लो समय कोरोना संक्रमितको संख्या बढ्दै जाँदा गण्डकी प्रदेशभरबाट परीक्षण भने ३ सयको हाराहारीमा मात्र हुन थालेको छ ।

आज थप भएका संक्रमित संगै गण्डकीमा कोरोना संक्रमितको कूल संख्या १३ हजार ४ सय २१ पुगेको छ ।जसमा सक्रिय संक्रमित १ हजार ५ सय ६१ जना छन् ।

यस्तै पछिल्लो २४ घन्टामा गण्डकीबाट ५ जना कोरोनामुक्त भएका छन् । यो संगै, हालसम्म कोरोना संक्रमणबाट मुक्त भएर घर फर्किनेको संख्या ११ हजार ६ सय ७६ पुगेको छ ।

आज गण्डकीमा कोरोना संक्रमणबाट मृत्यु संख्या छैन । कोरोना संक्रमणबाट मृत्यु हुनेको कूल संख्या १८४ नै रहेको निर्देशनालयले जनाएको छ ।