सामाजिक कार्यमा अग्रसर नयाँ तर क्रियाशील लायन्स क्लब अफ पोखरा सेन्टेनियलले पोखरामा २ लाख मास्क वितरण गरिरहेको छ । कोभिड विरुद्ध खटिएका फ्रण्ट लाइनर्सका साथै सामुदायिक विद्यालयलाई मध्यनजर गर्दै मास्क वितरण गरेको क्लबले जनाएको छ । चीन स्थित द पाण्डा क्लबको सहयोगमा सेन्टेनियलले यहाँ मास्क वितरण गरेको हो ।

क्लबका अध्यक्ष प्रगत कायस्थका अनुसार २ लाख २५ हजार थान मास्क प्राप्त भएकोमा २५ हजार मास्क काठमाण्डौमा वितरण गरिएको छ । २ लाख मास्क पोखरा स्थित प्रहरी कार्यालय, ट्राफिक प्रहरी कार्यालय, पत्रकार महासंघ र विद्यालयहरुमा वितरण गर्ने काम भइरहेको छ । प्रहरीलाई १ लाख मास्क प्रदान गरिनेछ । कास्कीका पत्रकारलाई लक्षित गरी नेपाल पत्रकार महासंघ, कास्कीको कार्यालयमै पुगेर क्लबको टोलीले १० हजार थान मास्क प्रदान गरेको छ ।

क्लबका निवर्तमान अध्यक्ष बिजेश पालिखे, प्रथम उपाध्यक्ष पुष्पा गुरुङसहित अध्यक्ष कायस्थले नेपाल पत्रकार महासंघ कास्कीका अध्यक्ष दीपेन्द्र श्रेष्ठ, उपाध्यक्ष बिमला भण्डारी र सचिव रामप्रसाद तिमिल्सेनालाई सो मास्क हस्तान्तरण गरे । उनले पत्रकार पनि फ्रण्टलाइनमै रहेर काम गरिरहेका कारण थोरै भएपनि सहयोग हुने भन्दै पत्रकारलाई सम्झिएको बताए । पत्रकार महासंघ कास्की अध्यक्ष दीपेन्द्र श्रेष्ठले पत्रकारका लागि यो ठूलो राहत मिलेको उल्लेख गरे ।

सन् २०१७ मा स्थापित यो क्लबले गत वर्ष घान्द्रुक पुगेर आँखा शिविर गरेको निवर्तमान अध्यक्ष बिजेश पालिखेले जनाए । २५० जना बढीको आँखा जाँच गरिएकोमा १० जनालाई पोखरा नै ल्याएर उपचार गरेको थियो ।