यस क्षेत्रकै सबैभन्दा अग्रणी र जेठो सामाजिक संस्था पोखरा उद्योग वाणिज्य संघमा अहिले ३३ औं महाधिवेसनको सरगर्मी बढेको छ । शनिबार नयाँ नेतृत्व चयन हुँदैछ । उम्मेदवारहरु प्यानल नै घोषणा गरेर मतदाता फकाउने काममा जुटेका छन् । नारायण कोइराला र बिन्दु कोइराला सुवेदीको दुई प्यानल चुनावमा होमिदैँछ ।

हालका महासचिव अर्जुन पोखरेल वाणिज्य तर्फका उपाध्यक्ष पदका उम्मेद्वार छन् । संघमा कार्यसमिति सदस्य, उपमहासचिव हुँदै महासचिवको जिम्मेवारी कुशलतापूर्वक बहन गरेका युवा व्यवसायी पोखरेल आसन्न निर्वाचनमा व्यवसायीले जिताउनेमा ढुक्क छन् ।

महासचिवको जिम्मेवारीपछि सिधैं अध्यक्षका लागि आकांक्षी बन्ने चलन जस्तै रहेकोमा पोखरेल भने अग्रजलाई सम्मानका साथ नारायण कोइरालालाई अघि बढाउँदै उपाध्यक्षमा उम्मेदवारी दिएको बताउँछन् ।

‘मलाई पनि वरिष्ठ उपाध्यक्ष वा अध्यक्ष बन्नका लागि धेरैले आग्रह गर्नुभएको थियो,’ पोखरेल भन्छन्, ‘अग्रजलाई सम्मान गर्नुपर्छ र नेतृत्वका लागि हतारिनु हुन्न भन्ने मेरो मान्यताका कारण वाणिज्य उपाध्यक्षमा बसेर राम्रो टिम बनाउन मैले सक्रियता देखाएको हुँ ।
उनले प्यानल बनाउँदा बर्तमान कार्यसमितिमा रहेका पदाधिकारी तथा सदस्यहरुलाई अपग्रेड गरिएको पोखरेल बताउँछन् ।
आगामी दिनमा निजी क्षेत्रको भूमिका देशमा अझै बढ्ने सम्भावना रहेकाले राम्रो र कुशल नेतृत्व संघमा आवश्यक रहेको पोखरेल बताउँछन् । ‘पोखरा पर्यटकीय नगरी हो । पर्यटन प्रवद्र्धन लगायत निजी क्षेत्रको हकहितका क्षेत्रमा संघले अग्रणी भूमिका निर्वाह गर्नुपर्नेछ,’ उनी भन्छन् ।

२०७१ देखि ०७३ सम्म उनी कार्यसमिति सदस्यमा निर्वाचित भए भने २०७३ देखि ०७५ सम्म उपमहासचिवको रुपमा काम गरे । ग्रामिण पर्यटन विकासको लागि उनले अभियानकै रुपमा विभिन्न काम गरेका छन् भने संस्थागत रुपमा उद्योगी व्यवसायीका हक हितका लागि आवाज बुलन्द पार्दै आएका छन् ।

संघलाई सानो लगानीबाट व्यवसाय सुरु गर्नेदेखि ठूलो लगानी गर्ने सबै व्यवसायीहरुको साझा संस्था बनाउने अभियानलाई विशेष प्राथमिकता दिने र उद्योगी व्यवसायीलाई राज्य र प्रशासनिक निकायबाट हेर्ने दृष्टिकोणमा परिवर्तन ल्याउन निरन्तर क्रियाशील रहने बताएका छन् । कोभिड–१९ ले धरासायी बनाएको पर्यटन तथा यातायात क्षेत्रको पुनरुत्थानको लागि सरोकारवाला निकायसँग सहकार्य एवम् पर्यटन प्रवद्र्धनका विविध गतिविधि सञ्चालनमा पहल गर्ने उनको भनाई छ ।

होटल संघ र आवास संघको समर्थन

पश्चिमान्चल होटल संघ र गण्डकी जग्गा तथा आवास विकास संघले उपाध्यक्ष (वाणिज्य) पदमा अर्जुन पोखरेललाई मत दिने निर्णय गरेको छ । दुई संस्थाले आधिकारिक निर्णय गरेर नै पोखरेललाई सघाउने निर्णय गरेका हुन् । पोखरेल होटल संघको सदस्य हुन् भने आवास विकास संघको पुर्व अध्यक्ष हुन् । यस्तै, युवा उद्यमी मन्चले समेत पोखरेललाई नै मतदान गर्न मातहतका मतदाताहरुसँग आग्रह गरेको छ ।

आफ्नो संस्थाका समस्या समाधानका लागि संस्थाकै सदस्यलाई नेतृत्वमा पु¥याउनुपर्ने भन्दै विभिन्न संघ संस्थाले पोखरेललाई निर्वाचित गराउन अपिल गरेको छ ।