बार्सिलोना स्पेनिस सुपर कपको उपाधि जित्न असफल भएको छ । आइतबार राति भएको फाइनल खेलमा बार्सिलोनालाई पराजित गर्दै एथ्लेटिको बिल्बाओले स्पेनिस सुपर कपको उपाधि जितेको छ । एथ्लेटिको बिल्बाओले बार्सिलोनालाई ३–२ ले पराजित गरेको हो ।

सेभिल्लाको मैदानमा भएको खेलमा ४०औं मिनेटमा एन्टोनि ग्रिजम्यानको गोलबाट बार्सिलोनाले खेलमा अग्रता बनाएको थियो । लगतै ४२औँ मिनेटमा बिल्बाओका लागि ओस्कार डी मार्कोसले बराबरी गोल गरे । त्यसपछि ७७औं मिनेटमा ग्रिजम्यानले अर्को गोल गरी पुनः टोलीलाई अग्रता दिलाए । तर खेल सकिनै लाग्दा बिल्बाओका आसिएर भिल्लालिब्रेले गोल गर्दा खेल बराबरी भएर अतिरिक्त समयमा धकेलिएको थियो।

३० मिनेट अतिरिक्त समय थपिएपछि लगतै ९३औँ मिनेटमा बिल्बाओका लागि इलाकी विलियम्सले गोल गरी बार्सिलोनालाई पछि पारे । त्यसपछि बाँकी समयमा बार्सिलोना खेलमा फर्किन सकेन।

खेलको अन्तिमतिर १२०औं मिनेटमा बार्सिलोनाका कप्तान लियोनल मेसीले रातो कार्ड पाए ।एथ्लेटिको बिल्बाओले सन् १९८५ यता दोस्रो पटक उपाधि जितेको हो ।