कोभिडका कारण सुनसान बनेको नाटक घरमा चहलपहल सुरु भएको छ । नाटक सम्बन्धित संस्थाले देशभर माघ १ देखि नै नाटकघर खोल्न सुरु गरेका छन् । पोखरेलीले पनि चैतदेखि नाटक हेर्न पाउनेछन् । त्यसअघि भर्चुअल रुपमा पोखरा थिएटरले गण्डकी प्रदेश स्तरीय विद्यालय नाटक महोत्सव गर्दैछ । यस नाटकमा छनौट भएका उत्कृष्ट ४ नाटक थियटरमै मञ्चन गरिने जनाइएको छ ।

गतवर्ष पोखरा महानगरपालिका भित्र रहेका विद्यालयहरुबीच गरिएको नाटक महोत्सव यस वर्षबाट प्रदेश स्तरीय रुपमा गर्न लागिएको पोखरा थिएटरले पत्रकार सम्मेलन मार्फत जानकारी दिएको हो । महोत्सव भर्चुअल माध्यमबाट नाटकको आवेदन आह्वान, छनोट लगायतका कार्यहरु हुने महोत्सव निर्देशक परिर्वतन कार्कीले जानकारी दिए ।

परिवर्तनका अनुसार छनोट भएका उत्कृष्ट ४ नाटकलाई पुरस्कृत गरिने र ती नाटक पोखरा थिएटरको गन्धर्व नाटक घरमा मञ्चन गरिने छ भने थिएटरको अफिसियल युट्युव च्यानलमा पनि राखिने छ । नाटक महोत्सवमा प्रथम हुनेले नगद ५० हजार र प्रमाण पत्र, द्धितिय हुनेले २५ हजार , तृतिय हुनेले १२हजार ५०० र सान्त्वना हुनेले ५ हजार र प्रमाण पत्र पाउने छन् ।

नाटक महोत्सवमा सहभागी हुन इच्छुक विद्यालयले भोलिमाघ ७ गतेदेखि माघ २८ गतेसम्म नाटकको भिडियो पठाइसक्नु पर्ने आयोजकले जनाएको छ ।

नाटकमा प्रस्तुति एकल हुनुपर्ने,नेपाली नाटक हुनुपर्ने, नेपाली भाषा वा साङकेतिक भाषाको पनि प्रयोग गर्न पाइने छ । त्यस्तै, कुनै पनि जाति, सम्प्रदाय, धर्म , संस्कृतिको मूल्य मान्यतालाई खलल पार्ने खालको नाटक मुल्याङकन प्रक्रियामा सहभागी नगराइने जनाइएको छ ।

नाटकको समयावधि घटिमा १० देखि बढिमा १५ मिनेटसम्मको हुनुपर्ने , नाटकलाई भिडियो खिचेर पठाउनुपर्ने, भिडियो स्पष्ट र गुणस्तरयुक्त हुनुपर्नेछ । महोत्सवमा गण्डकी प्रदेश भित्र माध्यमिक तहसम्म अध्यनरत विद्यार्थीहरुले सहभागीता जनाउन सक्ने आयोजकले बताएको छ ।

लेखन, निर्देशन आवश्यकता अनुरुप विद्यार्थी स्वयम् वा अन्य व्यक्तिहरुले पनि गर्न सक्ने, नाटकको भिडियोको साथमा अनिवार्य रुपमा विद्यालयको स्वीकृति पत्र पनि समावेश गर्नुपर्नेछ ।