पोखरा – पोखराको टुटुङ्गास्थित वन विज्ञान अध्यन संस्थानको प्रयोगशालाबाट चोरी भएको वन्यजन्तुको अखेटोपहार बेवारिसे अवस्थामा फेला परेको छ ।

पोखरा महानगरपालिका वडा नं -१५ स्थित संस्थानको प्रयोगशाला भवनको प्रयोगशालामा राखेको वन्यजन्तुको अखेटोपहार चोरी भएको स्थानबाट अन्दाजी ४०० मिटर पश्चिम तर्फ बनपाले जंगलघाटको पँधेरोस्थित प्लाष्टिक, जुटको बोरा र कालो झोला भित्र बेवारिसे अवस्थामा चितुवाको छाला चार थान, चितुवाको दाँतहरु, हाड, चितुवाको दाह्रा २ थान लगायत हड्डीहरु फेला परेको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

हमालका अनुसार उक्त अखेटोपहार चोरी गर्नेको पहिचान नभएपनि बरामद गरिएको उक्त समान वडा प्रहरी कार्यालय रामबजारमा ल्याएर थप अनुसन्धान गरिनुका साथै चोरीमा संग्लग्नहरुको खोजतलास भैरहेको प्रवक्ता प्रवक्ता हमालले जानकारी दिए ।        

स्मरणिय छ, गत माघ ९ गते शुक्रबार राति वन विज्ञान अध्ययन संस्थानको प्रयोगशालाबाट वन्यजन्तुका बहुमूल्य अंग बाघ तथा चितुवाको छाला ६ थान, चितुवाको टाउको, दाँत, हण्डी, २ थान मृगको सिङ, १ थान छाला, बदेलको टाउको, हड्डी लगायत वन्यजन्तुका बहुमूल्य सामान चोरी भएको थियो ।