नेपाल कम्युनिष्ट पार्टी प्रचण्ड-माधव समूहले आयोजना गरेको देशव्यापी आमहड्तालको प्रभाव पोखरामा पनि परेको छ । प्रधानमन्त्री केपी शर्मा ओलीले सनकका भरमा संसद विघटन गरेको र संवैधानिक आयोगहरुमा असंवैधानिक ढंगले नियुक्ति गरेको विरोधमा सो समूहले बन्द आह्वान गरेको जनाएको छ ।

काठमाण्डौको गोंगबु क्षेत्रमा दुई जना यात्रु बनेर ट्याक्सी जलाएको घटना सार्वजनिक भएपनि पोखरामा अप्रिय घटना भने भएको छैन । कास्की प्रहरी हाई अलर्टमा बसेको जनाएको छ । चोक चोकमा बन्दकर्ताहरु छन् । उनीहरुले गाडी तथा बाइक चल्न रोकेका छन् । पसल खुल्न दिएका छैनन् ।

यसैबीच, केपी ओलीका समर्थकहरु भने बाइक र्याली गरेर बन्द विफल पार्न हिँडेका थिए । यस क्रममा पृथ्वीचोक, महेन्द्रपुल क्षेत्रमा तनावको अवस्था सिर्जना हुन लागेको थियो । प्रहरीले केपी समर्थकहरुलाई जहाँबाट आएको त्यहीं फर्काउन प्रयास गरिरहेका थिए । उनीहरु चोकमा बसेका केपी बिरोधी समूहलाई जिस्क्याउन पुगेका थिए । प्रहरीले भने झडपको अवस्था सिर्जना हुन नदिन माहौल नियन्त्रणमा लिन सफल भइरहेको छ ।

पोखराको महेन्द्रपुल र पृथ्वीचोकमा प्रहरी र बन्दकर्ताबीच सामान्य विवाद भएको थियो । बन्दकर्ताले गुडिरहेको कारलाई लाठी हानेपछि प्रहरीले रोक्न खोजेको थियो । कास्की प्रहरी प्रवक्ता डिएसपी सुवास हमालले अहिलेसम्म कोहि कसैलाई नियन्त्रणमा नलिएको र अप्रिय घटना पनि नभएको बताएका छन् ।

कास्कीमा निजी केही गाडीहरु चले पनि सार्वजनिक गाडीहरु, विद्यालय, मूख्य बजारका पसलहरु बन्द छन् । विद्यालयहरुले परीक्षा सारेका छन् । उद्योग तथा व्यापारिक केन्द्र बन्द छन् । बन्दकर्ताहरुले एम्बुलेन्स, बिरामी बोकेका ट्याक्सी, दूध तथा अत्यावश्यक मालबाहक गाडी, प्रेसका सवारी भने चल्न दिएका छन् ।