प्रधानमन्त्री केपी ओलीले आफ्नो दलको आन्तरिक द्वन्द्वबाट उम्किँदै पद जोगाउन संसद विघटन गरिदिए र वैशाखमा चुनाव घोषणा गरे । त्यसपछि चुनावको पक्षमा माहोल बनाउन देशका मुख्य शहरहरुमा सभा गर्न थाले ।

तर मंगलबार सर्वोच्चले प्रतिनिधि सभा पुनःस्थापनाको पक्षमा फैसला गरेपछि ओली समूहका आगामी कार्यक्रम स्थगित भएका छन् । स्थायी कमिटी बैठकले गर्ने निर्णयअनुसार आगामी कार्यक्रम तय गरिने ओली समूहका नेताहरुको भनाई छ ।

प्रतिनिधि सभा विघटन र चुनावको पक्षमा माहोल बनाउन देशका विभिन्न शहरमा जनसभा गर्दै आएको ओली समूहले फागुन १४ गते सुर्खेतमा र १५ गते पोखरामा वृहत् जनसभा गर्ने कार्यक्रम थियो । ओली पक्षीय नेकपाले सुर्खेत र पोखरामा गर्ने जनसभा स्थगित भएका छन् । प्रतिनिधि सभा पुनःस्थापना भएसँगै ओली नैतिक रुपमा संकटमा छन् । यस्तो अवस्थामा तामझामका साथ विभिन्न जिल्ला र सहरमा गर्न लागिएका सभाहरु स्थगित गर्न थालिएको हो ।

पोखरामा फागुन १५ गते हुने जनसभाका लागि सबै तयारी स्थगित गरिएको ओली समूहका नेकपा गण्डकीका एक नेताले बताएका छन् । पोखरामा हुने १५ गतेको जनसभामा १ लाख २० हजार कार्यकर्ता उतार्ने तयारीका साथ पार्टीले विभिन्न उमिति उपसमिति बनाएको थियो । पार्टी कार्यकर्तादेखि युवाहरु, विद्यार्थीहरुलाइ पनि परिचालन गरेको थियो । मोटरसाइकल र्याली र मार्चपासको तयारी पनि भएको थियो ।

यस्तै, सुर्खेतमा हुने फागुन १४ गतेको जनसभा पनि स्थगित भएको छ ।