पोखरा । नेकपा एमालेका वरिष्ठ नेता झलनाथ खनाल–माधव नेपाल समूहले गण्डकी प्रदेशमा समानान्तर पार्टी कमिटी गठन गरेको छ । उक्त प्रदेश कमिटीको नेतृत्व गर्ने जिम्मेवारी नेता सुरेन्द्र पाण्डेले पाएका छन् ।

पाण्डेलाई एमालेको केपी ओली समूहले आजै कारबाही गरेको थियो । विहीबार नेता नेपाल आफैं पोखरा आएर समानान्तर कमिटी बनाएका हुन् । प्रदेशको संयोजक पाण्डे बनेका छन् भने सहसंयोजकमा तुलबहादुर गुरुङ र श्रीमाया थकाली रहेका छन् ।

विहीबार आयोजित भेलाले प्रदेशका सबै जिल्लामा समानान्तर कमिटी बनाउने गरी नेताहरुलाई जिम्मेवारी दिएको छ । जिल्ला भेला गर्ने जिम्मेवारी कास्कीमा धनराज आचार्य, स्याङ्जामा रामचन्द्र भट्टराई, म्याग्दीमा बालकृष्ण सुवेदी, बागलुङमा इन्द्रलाल सापकोटा, पर्वतमा भक्त कुँवर, तनहुँमा शंकरनारायण श्रेष्ठले पाएका छन् ।

नेकपा एमाले कास्कीमा आचार्यको अध्यक्षतामा ७५ सदस्यीय कमिटी गठन गरिएको हो । कमिटी सचिवमा होम नेपाली छन् । छिट्टै अर्को भेला गरेर पूर्ण कमिटीलाई औपचारिकता दिइने जनाइएको छ ।

कास्कीको भरतपोखरी निवासी आचार्य नेकपा एमाले उद्योग वाणिज्य क्षेत्रका निवर्तमान केन्द्रीय अध्यक्ष हुन् । पार्टीको केन्द्रीय विभागको सदस्य, जिल्ला कमिटीका पूर्व सचिवालय सदस्य तथा पृथ्वीनारायण क्याम्पस पोखरा स्ववियूका पूर्व अध्यक्ष समेत हुन् । कास्की क्षेत्र २ बाट स्व। रवीन्द्र अधिकारी पत्नी विद्या भट्टराईले प्रतिनिधिसभाको चुनाव लड्दा उनी आर्थिक विभाग प्रमुख थिए ।