पोखरा स्थित प्राइम सहकारी संस्थाका संस्थापक अध्यक्ष अनिल जोशीको कोरोना सङ्क्रमणबाट मृत्यु भएको छ ।

जिल्ला सहकारी सङ्घ, खोटाङका अध्यक्ष तथा लालुपाते सहकारी संस्था, खोटाङका अध्यक्ष समेत रहेका जोशीलाई वैशाख ५ गते कोरोना पुष्टि भएको थियो । सहकारीकै कामको सिलसिलामा उनी चैत २९ गते बिराटनगर हुँदै पोखरा आएका थिए । संक्रमण पुष्टि पछि वैशाख ६ गतेदेखि उनलाई अस्पतालमा भर्ना गरिएको थियो ।

चैत २५ मा दिक्तेलबाट विराटनगर पुगेका जोशीमा विराटनगर हुँदा सामान्य रुघाखोकीको संक्रमण देखिएको पारिवारिक स्रोतले जनाएको छ । रुघाखोकीले च्याप्दै गएपछि पोखरा आइपुग्दा स्वाब परीक्षण गर्दा जोशीलाई कोरोना संक्रमण पुष्टि भएको हो ।

सहकारी अभियन्ता जोशीको ४४ वर्षको उमेरमै कोरोना संक्रमणबाट निधन भएपछि परिवार शोकमा डुबेको छ । दुई श्रीमती र एक छोराका बुबा अनिल लामो समयदेखि सहकारी संस्थामै क्रियाशील थिए ।